КОЦУР – У коцурским Доме култури вчера, 13. априла, почали 6. Днї театру „Владимир Сабо-Дайко“ котри буду тирвац по нєдзелю, 15. април.
Манифестация почала зоз означованьом 50 рокох дїялносци у култури и театру Мирослава Медєша и 50 рокох роботи у култури Радойки Лазор.
Програму и виставу фотоґрафийох пошвецену спомнутим ювилантом отворели предсидателька Етно клуба „Одняте од забуца” Аранка Медєши котра присутних упознала зоз активносцу Радойки Лазор у обласци култури, а Стеван Самочета пречитал звит о значносци роботи у култури Мирослава Медєша, насампредз у драмским живоце у Коцуре и у Петровцох.
Публику и културних дїячох, чийо ювилеї ше означує, привитал и предсидатель Рускей матки Дюра Папуґа, котри визначел же є приємно нєсподзивани же тогорочни Днї театру буду у духу дзецинскей ґлуми и дзецинских представох.
После отвераня вистави и манифестациї у голу Дома култури, у Велькей сали Моника Гарди и Аранка Медєши публику упознали зоз скарбом Владимира Сабо-Дайка, представели програму тогорочних Дньох театру и ювилантом Мирославови Медєшови и Радойки Лазор уручели пригодни дарунки.
Присутних привитала и народна посланїца Олена Папуґа котра визначела же би єдна така манифестация як цо то Днї театру у Коцуре, требала мац векшу потримовку як Нацоналного совиту, так и других наших институцийох.
Нащивителє у предлуженю програми одпатрели представу „Дзивчатко и жобрак”, котру по тексту Людмили Шандаловей зоз Свиднїку режировали Таня Бркич и Моника Гарди спред Етно клуба „Одняте од забуца”.
По законченю представи на коктелу у Огньогасним доме предлужене друженє.
