НОВИ САД – У полней церкви св. апостолох Петра и Павла у Новим Садзе, Миколай подзелєл 68 пакецики дзецом внєдзелю, на читаней Служби Божей, хтору служел парох о. Юлиян Рац.
У своєй казанї, вон гварел:
– Най вам святи Миколай умножи любов до Створителя, Бога, хторому треба буц подзековни за шицко. Зоз своїм прикладом, святитель нас поучел же треба буц дарежлїви. Робме и ми другим, ближнїм добре, та ше нам вец так и враци, зоз подзековносцу.
Дзеци у церкви привитали Миколая и подзековали му зоз пригодну програму, за цо их пририхтали вироучительки ш. Винкентия и Мелания Римар.
Як парох о. Рац виглашел, од шлїдуюцей нєдзелї нє будзе виронаука, по друге полрочє. Парох тиж предложел уводзенє читаней, дзецинскей Служби Божей, як гварел, на розумлївим язику, на 11,30 годзин, дас до 12 годзин, после хторей би була кратка виронаука, и апеловал на родичох же би ше з тей нагоди явели и порадзели.
