КОЦУР – У коцурским Каритасу штварток, 25. мая отримана схадзка на хторей члени Каритасу, на чолє з директором Каритасу Апостолского еґзархату за грекокатолїкох у Сербиї Янком Катоном и координаторку Каритасу у Коцуре ш. Михаїлу Воротняк, розпатрали плани за наиходзаци период.
Найважнєйша точка о хторей бешедоване то сход з надбискупом Станиславом Хочеваром 10. юния у Беоґрадзе. Беоґрадски надбискуп Станислав Хочевар сход орґанизує за шицких вирних, волонтерох, симпатизерох и роботнїкох у Каритасу, та заинтересовани за одход до Беоґраду най ше по 5. юний приявя шестри Михаили, а превоз обезпечени.
Коцурски Каритас ше тиж уключи до гуманитарней акциї збераня пенєжу за операцию очох свойого сограждана, школяра Желька Шанту, так же у грекокатолїцкей церкви будзе поставена шкатула до хторей вирни годни дац добродзечни прилог.
У рамикох Каритасу пошвидко почнє робиц ґеронто-служба за допатранє старих, дзе штири фахово особи з Каритасу каждодньово буду обиходзиц старих Коцурцох, а пенєж за реализованє того проєкту обезпечел Покраїнски секретарият за социялну политику, демоґрафию и ровноправносц полох. На схадзки бешедоване и о сходзе за младих и старших хтори на ютре будзе у Бечею, з тему „Нове чловечество“.