РУСКИ КЕРЕСТУР – После прешлотижньового збераня подписох процив предложеного Напредок пририхтаного плану реорґанизациї „АБЦ ФУД” АД Руски Керестур, по хторим предложене же би ше поверительом у Д-класи – поєдинцом и меншим фирмом – у терашнїм планє реорґанизациї уж за 40 одсто зменшане длуство зменшало за 60 одсто, їх адвокатка др Мария Йоксович з Кули самим концом прешлого тижня до Привредного суду у Зомборе придала службену Пригварку же ше нє складаю з предложеним Планом реорґанизациї „АБЦ ФУД”, подкрипену з 200 подписами.
Як Мария Йоксович гварела за новини „Руске слово”, до Привредного суду придала и вимогу же би ше паприґарох и роботнїкох котри тужели фабрику видвоєло од фирмох у заєднїцкей Д-класи поверительох до окремней класи, о чим будзе одлучовац судия.
Адвокатка вимага и же би ше цали Напредок пририхтани план реорґанизациї преложело на руски язик, а Суду предочела и други нєдостатки у тим планє.
– Пригварка на План послата и до „АБЦ ФУД” и до Суду и вони ше о нєй маю вияшнїц по 16. юний. По тот датум шицки, кажди поверитель, муши буц написмено обвисцени о судскей розправи и ма достац гласацки лїсток, аж би потамаль до Суду мал врациц свою одлуку, односно як гласал и увидзиме чи тота процедура будзе випочитована – гварела Мария Йоксимович за „Руске слово”, а у шлїдуюцим чишлє наших новинох, хторе видзе того тижня, годно пречитац обсяжнєйши текст о тей теми.
Предсидателька Здруженя паприґарох Душица Орос за Рутенпрес наглашела же ше паприґаре и други за хторих предвидзене зменшанє длуства чувствую бар очкодовани, а похвалєла и шицких продуковательох паприґи и другей желєняви, як и бувших и терашнїх занятих у „АБЦ ФУД” же ше за кратки час, лєм за два днї, прешлого тижня одволали на подписованє процив прилайованя нового плану реорґанизациї.
Оросова подзековала и на началней потимовки Месней заєднїци, а як гварела, руководительство Здруженя паприґарох би о тей теми тих дньох мало бешедовац и з предсидательом Општини Кула Перицом Видеканїчом.
Кед слово о терашнїх занятих у Хладзальнї, як и у першим, ище вше актуалним, и у предложеним новим планє реорґанизациї нєвиплацени нето заробки занятим би були цалком виплацени пред початком применьованя Плану реорґанизациї, та вони о нїм нє буду гласац.
Судска розправа и гласанє за Напредок пририхтани план реорґанизациї „АБЦ ФУД” у
Привредним судзе у Зомборе заказана за 16. юний на 12 годзин.