Дюра Папуґа: „Бач Керестур асоцияция на мадяризацию”

автор мар
1.1k Опатрене

РУСКИ КЕРЕСТУР − Вчера вечар отримана схадзка Управного одбору (УО) Рускей матки (РМ), на котрей бешедоване о поднєшених проєктох на вецей конкурси, алє розпатрана и нєточна назва Руского Керестура на мадярским язику котра стої написана на табли на уходзе до валалу.

Предсидатель РМ Дюра Папуґа поднєсол звит о поднєшених осем приявох зоз проєктами на конкурси локалних самоуправох Кула и Шид, двох секретариятох АП Войводини и Министерства за културу и информованє Републики Сербиї. Потераз одвит достали лєм з општини Кула, одкадз достаню 30 000 динари за Стретнуце поетох 23. септембра, а зоз Шиду обчекую же достаню 100 000 динари за треци „Русин филм фест”. Зоз других конкурсох ище вше нєт резултати.

Остатнї два роки, РМ при Шветовей ради Руснацох/Русинох/Лемкох (РРЛ), за награду „Василя Турока Гетеша” у обласци култури предкладала визначного руского уметнїка Владу Нярадия, та и того року обновя свойо предкладанє. Дополнєну биоґрафию и предкладанє пошлю по 20. април, а додзельованє тей награди будзе на 10. Медзинародним биєналу лемковскей/русинскей култури 19. и 20. мая у Кринїци, у Польскей.

Папуґа поднєсол и звит зоз 3. зашеданя Шветовей ради РРЛ, а предсидатель Форума младих РМ Борис Фейди зоз зашеданя Шветового форуму русинскей младежи, обидва отримани у Бистри у Румуниї од 9. до 11. марца.

Прилапене и предкладанє о пририхтованю за одход на 10. Медзинародни биєнале лемковскей/русинскей култури у Кринїци, ище вше нє маю одвит по конкурсу на котри конкуровали з тим проєктом, а за цо вимагали 118 000 динари. Плановане же би попри членох УО Рускей матки, путовали и члени КПД „Карпати” з Вербасу.

Бешедоване и о нєправилней назви Руского Керестура на мадярским язику, котра написана на уходзе до валалу на троязичней табли. Тераз стої назва Бач Керестур, цо и була назва валалу, алє лєм у Першей и Другей шветовей войни. З тей нагоди, а з цильом пременки, пошлю вимоги Совиту Месней заєднїци Руски Керестур, Одбору за урядове хаснованє язика и писма при Националному совиту Руснацох и Совиту за медзинационални одношеня Општини Кула.

Як гварел Дюра Папуґа, назва Бач Керестур асоцира на чежки войново часи и нєприємни ситуациї котри були пошлїдок тедишнєй мадяризациї. Така назва валалу на мадярским язику дефинована и як традицийна назва у покраїнскей одлуки о назвох населєних место, пре цо тиж будзе потребне реаґовац.

ПОВЯЗАНИ ТЕКСТИ