ДЮРДЬОВ – Всоботу, 10. новембра, млади Дюрдьовчанє з Културно-уметнїцкого дружтва „Тарас Шевченко” у своїх просторийох орґанизовали треци Бал младих.
Баловали ше коло сто млади особи зоз Руского Керестура, Коцура, Нового Саду, Петроварадину, Ветернику и Дюрдьова.
На Балє ше слухало преважно руску народну и забавну музику, а и того року грал „Пицикато бенд”.
Дзекуюци 97 спонзором зоз Жаблю, Руского Керестура и Дюрдьова, даровани 166 томболи. Тогорочну награду, ваучер у туристичней аґенциї од 20 000 динари за вецей, або єдно путованє без часового огранїченя, достал Далибор Нединич з Дюрдьова.
Млади ше баловали до самого рана, та ше орґанизаторе наздаваю же ше госцом пачело друженє, та на їх Бал приду и нарок.