РУСКИ КЕРЕСТУР − Вчера, 28. децембра, у Велькей сали Дома култури после пригодней програми котру пририхтали дзеци з Дзецинскей заградки „Цицибан” и нїзших класох Основней школи „Петро Кузмяк”, Дїдо Мраз подзелєл пакецики наймладшим Керестурцом.
На програми з трома писнями Дїда Мраза перше привитали дзеци з Цицибановей музичней школи зоз їх фахову руководительку Таню Фейди, потим рецитовали дзеци зоз ґрупи Оленки Русковсковей. Дзеци зоз пририхтуюцей предшколскей програми при воспитачки Емилиї Костич єдну писню одрецитовали, а другу одшпивали.
Школяре IIб класи при учительки Верунки Медєшовей тиж шпивали Дїдови Мразови, а зоз керестурского оддзелєня Школи за основне музичне образованє наступел дуо гармоникох, камерни состав, як и дуо и три на клавиру котрих пририхтал наставнїк Мирон Сивч.
Под час програми, Дїдо Мразово помоцнїки дзелєли бомбони публики, а на концу Дїдо Мраз подзелєл 152 пакецики з лакотками дзецом, до котрих того року Месна заєднїца подаровала и по єдну дзецинску кнїжку з виданьох НВУ „Руске слово”.
