Пред двома роками зоз средствох месного самодоприносу Месна заєднїца у Руским Керестуре поставела пейц камери за надпатранє – штири на уходох, односно виходох з Керестура и єдну до центру, хтора патри на крижну драгу. Инвестиция теди коштала коло 864 000 динари.
Як гвари секретар МЗ Михайло Сабадош, задумка була же би ше и на таки способ допринєсло зменшаню крадзох у валалє, насампредз кед то нє особи з Керестура, понеже добре видно и през дзень и вноци хто уходзи и виходзи з валалу.
Уж после поставяня камерох їх робота дала и конкретни резултати, кед праве прейґ нїх потвердзени крадоше древа котри оперовали углавним у местох оджацкей општини, крадли древо и з керестурского беґелю, а з украднутим древом на вецей заводи виходзели з Керестура у напряме Савиного Села.
НАЙВЕЦЕЙ ОПАТРАНЯ ПРЕ КРАДЗИ БИЦИҐЛОХ
– То камера зазначела вецей раз, на яким авту були, яки час и подобне, приявене то полициї, хтора далєй превжала цо потребне – гвари Сабадош, а як перши добри конкретни приклад хасну тих камерох то потвердзел и заменїк командира Полицийного оддзелєня Руски Керестур Полицийней станїци Кула Станиша Маринкович.
Як потолковал секретар Сабадош, Месна заєднїца нє ма длужносц вишлїдзовац даяку криминалну роботу, то пребера полиция, алє праве пре постоянє тих камерох, за два роки до МЗ приходзели велї Керестурци опатриц чи на знїмкох зазначене як им скапала бициґла, превериц, лєбо спозориц на даяки подозриви шпацираня, воженя на автох позно вноци коло їх обисцох. Вец авта препознаю на даєдним з виходох з валалу, лєбо у центре, а по прияви крадзи, лєбо даякей подозривей ситуациї, полиция такой приходзи поопатрац знїмки и реаґує далєй по їх процедури.
Камери розришели и одредзени нєприємни ситуациї, помогли у ришованю менших транспортних потупеньох, а як ше указало, найвецей єст реакциї и опатраня знїмкох пре крадзу бициґлох.
– Бициґли найчастейше украднути у центре валалу, и кед крадоше нє з места, на камерох видно як з бициґлами виходзели з валалу, цо ше тиж приявює полициї. Важне наглашиц же би тоти знїмки у МЗ людзе пришли опатриц такой по приявйованю крадзи, односно цо скорей, бо знїмки нє можеме барз длуго чувац пре простор у компютеру. Кед же дахто нє може присц такой, до МЗ мож явиц же би ше зачувало знїмок за познєйше препатранє – надпомнул Михайло Сабадош.
Камери квалитетни и длуготирваци, нє губя ше, робя порядно, досц добре видно и цо ше збува вноци, з антенску систему облапени цали валал, и як заключує Сабадош, мож повесц же затераз дали позитивни ефекти у тим за цо су наменєни.
Роздумує ше же би камери було добре положиц на ище дзепоєдни места – на базен, ище єдну до центру унапрямену на парк, потим опрез уходу до Дому култури, дзе вше єст вельо бициґли и одкаль ше их найчастейше краднє, на уход до валалу коло каплїчки… но, можебуц док знова за тото будзе пенєжи.
У ВАЛАЛЄ ТЕРАЗ МИРНО
– Камери нам на хасен, на першим месце же дїйствую превентивно, алє и конкретно, бо после прияви, помагаю нам у утвердзованю крадзох, крадошох, лєбо даяких других криминалних роботох. Видно одкаль пришли, на якей превозки, кеди то було, и нє лєм тоти цо крадню з Керестура, алє и з других сушедних местох, а прехо-дза през Керестур – гвари заменїк командира Полицийного оддзелєня Руски Керестур Полицийней станїци Кула (хторому припада и Крущич) Станиша Маринкович.
Вон визначел же велї крадзи бициґлох розришени дзекуюци и камером, а од кеди єст камера у центре валалу, драстично зменшани потупеня. Вообще камери, чи тоти явни, чи цо покладзени на рижних подприємствох, приватних будинкох, барз добра помоц и од велького хасну у роботи полициї.
– Можем повесц же, у одношеню на скорей, у Керестуре тераз нїзка стопа криминалитету, нєт векши потупеня явного мира и порядку. Правда, нє роби анї диско, лєм подаєден кафич, було збуванє за младих на базену, цо прешло у порядку… Єст же ше хлапци поопиваю, та направя даяки нєшор, знїща даяки явни, чи приватни маєток, алє барз ридко. Було крадзи алату з обисцох, аж и пиря, найвецей бициґлох, мобилних телефонох, можебуц нам ше шицко анї нє приявює – гварел Маринкович, наглашуюци же у керестурским Полицийним оддзелєню робя штирме полицає, алє су скоро найменєй у Керестуре.
Тоти полицає барз часто одходза помагац колеґом у Кули и до других местох у општини, иду на обезпечованє спортских змаганьох, та мож заключиц же их ту єст мало. На даяки способ то тиж одредзени указатель о безпечносней ситуациї у валалє, а най би так и остало.
СЕЗОНА КРАДЗИ ПАПРИҐИ
– Понеже почала сезона обераня паприґи, у керестурским хотаре такой почали и крадзи, а пред тим було крадзи опреми за паприґу з поля. У општини зажила и польочуварска служба, дзе єден польочувар задлужени за керестурски хотар, а праве пре паприґу, тераз ше на тото дава дакус векшу увагу.
З нїма добре сотрудзуєме, виходзиме на терен по їх поволанки, алє проблем же нас полицайох ту єст мало, та их радзим же би ше можебуц баржей базовали на орґанизованє даяких акцийох процив крадошох, бо вони маю чувац лєм польо, а ми робиме и шицки други роботи – гвари Маринкович.
