РУСКИ КЕРЕСТУР – Управни одбор Руского народного театру (РНТ) „Петро Ризнич Дядя” вчера, 1. марца, на схадзки у Руским Керестуре прилапел звити о роботи и финансийним дїлованю, вименєни дзепоєдни одредби Статуту, а принєшена и одлука о проєкту хтори ше будзе робиц у новей театралней сезони.
Як поведзене у звитох, 2016. рок бул єден з финансийно найчежших у постояню РНТ, понеже главни финансиєр, Покраїнски секретарият за културу и явне информованє, одобрел лєм 550 000 динари за єден театрални проєкт, цо аж коло 70 одсто мєнєй як рок пред тим. Од снователя – Националного совиту Руснцох, достати ище 300 000 динари, так же у сезони 2015/16. заш лєм були витоворени два премиєри.
Праве пре нєдостаток средствох витворени и мєнєй госцованя з актуалнима представами РНТ – Вона нєвиновата” и „Цо видзела послуга”, а як поведзене, спрам терашнїх спознаньох, по покраїнским конкурсу у тим року за РНТ будзе опредзелєна ищє менша сума.
Пре зменшованє средствох за РНТ и його ище вше нє до конца ришени статус, бо ше го водзи як установу, а финансує як здруженє гражданох, на УО заключене же би НС Руснацох спатрел можлївосци за ришованє статусу нашого националного театру, аж спомнуте и його врацанє на аматерски статус.
Понеже зменшанє средствох по конкурсох з покраїнского уровню у тим року присутне и за други обласци култури и видавательну дїялносц меншинох, УО предложел же би НС Руснацох тот проблем винєсол и ришовал вєдно з другима совитами меншинох и Координацию националних совитох на уровню держави.
На вчерайшей схадзки УО Статут РНТ ускладзени з новима одредбами Закона о култури, по хторих за директора РНТ може буц вибрана особа з високим образованьом, котра ма найменєй 5 роки роботного искуства, як и же би активно знала руски язик. Исти условия важа и за окончователя длужносци директора Театру.
Гоч ище нє познате кельо средства буду опредзелєни за РНТ, а пре конкурованє з проєктом на актуални конкурс, УО одбор вчера одлучел же у новей театралней сезони на сцену постави першонаградзени текст з конкурсу РНТ за нови руски драмски тексти – „Белава принцеза” Сашу Палєнкаша.