Фото: stockio.com
На габох Радио Нового Саду єст три нєзвичайни емисиї на руским язику хтори правя амбицийни, любопитлїви млади людзе, а слово о нєзависней продукциї. Иван Канюх зоз Нового Саду, Соня Виславски и Йован Живкович зоз Руского Керестура обдумую, правя и реализую тоти емисиї, а яки теми обрабяю и з якима почежкосцами ше стретаю, пречитайце у шлїдуюцих шорох.
Йован Живкович свою емисию „Одняте од забуца” почал реализовац у октобру 2017. року.
Йован
– Обрабям теми зоз прешлосци, яки зме мали обичаї, прецо су таки, одкадз походза и ґенерално теми даяки ствари, предмети хтори скорей нє було тельо, або их анї нє було як наприклад – водовод. Нам, младим, нєзвичайне же людзе пред 50 роками нє мали основни ствари, бо ми звикли же би нам було скоро шицко доступне. Емисия идзе раз у двох тижньох на габох Радио Нового Саду, премиєрно стреду на 13 годзин и 30 минути, а реприза на соботу од 7 годзин рано – толкує Йован.
У октобру того року наполня ше точно три роки од кеди ше емитує емисию Ивана Канюха „Живот з вашого угла”.
– У емисиї обрабям актуални, дружтвени и табу теми, у зависносци од того яка тема у питаню, так и виберам своїх собешеднїкох. Емисию ше скорей емитовало кажди пияток, а тераз ше ю емитує перши, други и штварти пияток у мешацу на 13 годзин и 30 минути на габох Радио Нового Саду на 100 MHz, док трецого пиятку идзе емисия хтору рихта моя колеґиня Соня Виславски – гвари Иван.
Соня свою емисию и на интернет кладзе под меном „Иншаки сом, та цо”, а прави ю од децембра 2016. року.
– Обрабям теми хтори пошвецени животу особом зоз почежкосцами у розвою, тиж и їх фамелийом хтори им оможлївюю лєгчейши и щешлївши живот, алє и особом и здруженьом хтори робя зоз нїма и хтори им помагаю буц самостойнєйши. Тоти теми и тоту проблематику обрабям прето же думам же у нєшкайшим чаше, можебуц нє тельо як було скорей, алє ище вше постоя предрозсудки и страх од нєпознатого. На якишик способ, тота тема як едукация ширшей явносци, а з другого боку и як подгаднїк за розбиванє предрозсудкох – визначує Соня и додава же ше емисию емитує кажди треци пияток, на 13 годзин и 30 минути, а реприза всоботу од 8 годзин и 30 минути.
ВИВОЛАНЯ ЗОЗ ХТОРИМА ШЕ СТРЕТАЮ
Кед слово о пририхтованю емисийох и о темох, нашо собешеднїки ше зложели же их муша интересовац теми хтори обрабяю, а кед ше ґу тому дода любопитлївосц и любов, вец анї єден сеґмент у роботи нє чежки. Заш лєм, кеди-нєкеди ше стретню и зоз даякима виволанями.
Иван
– Часто ми потребни собешеднїки хтори розположени за розгварку, алє хтори нє жию у истим месце, дакеди кобурим зоз анонимну анкету, прето же людзе нє таки дзечни давац коментари на рижни теми хтори обрабям у емисиї а, медзи иншим, обрабям их наисце вшелїяки: „Педофилия”, „Цо нас чека после шмерци?”, „Сербия и Косово”, „Ваготносц и положнїцтво” итд. Пририхтованє емисиї начас барз важне, а добре планованє и орґанизация у новинарскей роботи наисце значи и вецей як пол роботи – толкує Иван.
За Йована найважнєйше же би здумал цо и яку тему будзе обрабяц.
– Перше треба здумац у глави идею о чим будзе емисия, здумац питаня и записац як би емисия мала випатрац и вец гевто пойдзе лєгчейше. Найважнєйше же би мнє тема интересовала, барз сом любопитлїви, та рахуєм же и других людзох буду тоти теми интересовац. Собешеднїкох глєдам у зависносци од емисиї, кед слово о прешлосци, вец до огляду приходзи гоч хтора старша особа хтора жила у тим одредзеним периодзе, а кед треба даяки историйни факти, вец глєдам фахово особи – визначує Йован.
Соня гвари же нє чежко направиц радио емисию, голєм у єй ситуациї, прето же кед чловек цошка люби, вец и ужива у тим цо роби. Вона толкує же можебуц дакеди чежше найсц собешеднїкох хтори жадаю приповедац о своїм живоце.
Соня
– Кед єст дахто хто би сцел подзелїц свою животну проповедку и на даяки способ вєдно зо мну ришиц и бориц ше процив тих предрозсудкох, може ше ми явиц на имейл адресу vislavski.sonja@gmail.com. У емисиї „Иншаки сом, та цо” сцем указац же нє шицко таке страшне, и же кед ше боїме од дачого, нє значи же себе нє шмеме дац нагоду упознац дакого, и же тоти особи нїч нє иншаки у одношеню на нас, у смислу кед слово о любови и потребох хтори кажди чловек ма. Упозната сом зоз тоту тематику, зоз особного искуства, и прето идея цалей тей емисиї така – визначує Соня.
Интернет и „одложене слуханє” оможлївюю же би радио обставал у змаганю зоз сучасну технолоґию, окреме кед ше роби о младшей популациї.
– Нажаль, нєзависна продукция ше нє находзи на „одложеним слуханю” на урядовим интернет сайту Радио-телевизиї Войводини, дзе мож послухац емисиї хтори зме препущели, алє ше ми сами знаходзиме, та нашо емисиї кладземе на сайт MixCloud – закончує Иван и додава же чаривносц радия праве у тим же би ше го слухало наживо, прето же вон дава упечаток яґод кед бисце праве у тей хвильки були часц єдного доброго друженя и зезаня, франтованя – як кед бисце зоз вашима приятелями то робели у вашим квартелю, авту, або на улїци, котре вам враца добре розположенє и ошмих на твар.