Етикета – защитни знак медзи людзми

автор Борис Ройко
1.3k Опатрене

У людским цивилизованим дружтве, та аж и у праисторийним, вше исновали якиш назви, ознаки, символи и титули по котрих ше людзе препознавали и дзелєли. Одкеди швет насадзени, вше мушели постояц найменєй голєм два касти людзох у дружтве, єдни цо робели за других, и тоти други цо тих перших водзели. Якиш шор мушел постояц, праведни, чи гевтот погубени, нє важне, алє го було, и постої и далєй.

Тото по чим ше людзе познали, а и сам їх шор, то праве одредзени ознаки, котри дзепоєдним були защитни знаки и окремни статус у дружтвеней заєднїци. Так то и нєшка. Тераз тото шицко на єден иншаки способ робя сучасни надписи, марки, або етикети.

Версачи, Ґучи, Армани, Долче Ґабана, Хуґо Бос и так далєй, и так далєй, шицко то етикети цо означую дацо, положенє, богатство, моц, якуш нєвироятну силу зоз котру ши понад шицких других. Становиско, рижни думаня и интерес модней индустриї, глупей буржоазиї и аристократскей баґри нам надрилюю же то так и же то треба прилапиц. Га треба, чом бизме нє, кед то уж так стотки роки тирва. Позната традиция. Треба ю почитовац и кланяц ше єй. Чом буц нормалнєйши, кед можеш буц и надалєй глупа овца за штриганє и дзелїц исти кармики зоз аванґардним статком.

Ноц. Приблукало ше рано. Швижи ранши воздух ше циска до мойого квартелю. Будзим ше, ставам, облєкам свою вчерайшу стару шмату, добри фриштик, моцна чарна кафа, и дзень може почац. У глави и далєй иста думка од вечара и блуканє за одвитом на питанє ґу котрим дружтвеним животиньом стануц, кого прилапиц, кого бранїц? Идзем до центру города позакуковац чи ше дацо, нє дай Боже, пременєло, пошло на лєпше. Патрим набок, коло велькей билей будовнї СНП-а и далєй иста слика, лєбо адолесценти фураю маркироване облєчиво, качкет зоз ровну крису набок и ґлумя опасних ґанґстерох, або зоз обритвенима главами и брадуринами, наоблєкани до рендох шицких можлївих фарбох, трипую гипстерох. Стара писня. Идзем далєй.

Уходзим до такволаней „модней” писти и руцам погляд на обидва боки. У заградкох, познатих пабох и кафичох шедзи громада людзох штреднєй богатей и худобней класи, та аж и спод того пасма. Опрез нїх нес кафи, пици, вельки фалати колачох, полни криґли, ошикани конзерви странских пивох, по єдно, або вецей паклочка циґаретлох, телефони и рижни други чудеса цо мож обчековац. Облєчени су до модерней етикетированей шмати, на руки велька годзинка, а на глави здзати чарни цвики. Шицко исте. Крем панство и елита, а у ствари, нїхто и нїч. Велька спреводзка самого себе. Фирмирана бида ознова на улїчки. Епилоґ исти – чисте пумпованє еґа.

Етикета гвари єдно, а тото под ню приповеда нє друге, алє треце, штварте, стоцете. Сон би висц вонка до стварносци, постац ява, а сирова реалносц го здоганя и враца назад на дно. Маркировани ренди цалком нєзначни, бо нє важне тото цо ношиш на себе, алє тото цо ношиш у себе. Так?

ПОВЯЗАНИ ТЕКСТИ