РУСКИ КЕРЕСТУР – На вчерайшей схадзки Совиту Месней заєднїци (МЗ) Руски Керестур винєшена информация о законченю судского поступку у хторим будовательне подприємство „Яворник” зоз Суботици тужело Управу за капитални укладаня Войводини и МЗ Руски Керестур пре нєвиплацени трошки за дополнююци роботи на Спортскей гали у Керестуре у авґусту и септембру 2013. року.
На основи пресуди Привредного суду у Новим Садзе, хтора до МЗ и Општини Кула сцигла початком мая, тужени першого шору – Управа за капитални укладаня Войводини и тужени другого шору – МЗ Руски Керестур, „Яворнику” солидарно маю виплациц 5 милиони 14 824 динари за дополнююци роботи на и у Спортскей гали, як и припадаюцу камату од септембра 2014. року.
Най здогаднєме, после препатрунку надпатраюцого орґану, дополнююци роботи у гали поробени на закрицу, на изолованю мурох, одводзеню атмосферскей води, поробени рижни оправки, як и електро-роботи, алє лєм на основи предрахунку и без явней набавки и познєйше подписаного контракту, так же и Управа за капитални укладаня и МЗ Руски Керестур на Пресуду уложели Жалбу.
Главни финансиєр вибудови школско-спортскей гали, як ше ю теди волало, була Управа за капитални укладаня, а як инвеститор ше водзело Месну заєднїцу. МЗ у тим поступку на Привредним суду заступа Општинске явне правобранительство, а Управу Покраїнске явне правобранительство.
Предсидатель Совиту МЗ Владимир Олеяр на вчерайшей схадзки гварел же ше после ширшей медийней акциї початком рока и далєй провадзи стан на фарми кравох, а шицко цо нє у складзе з предписанями ше фотоґрафує и посила до Алиянси за защиту природи, права животиньох и права людзох ЕПАР-ОИПА Сербия, зоз шедзиском у Суботици.
Спомнута алиянса о стану на фарми, з доказами и анализу, информує ресорне министерство Влади Сербиї, алє и одвитуюци орґани у Европскей униї и, як вчера поведзене, у МЗ обчекую же пошвидко до Керестура пре тото придзе и єдна окремна комисия Министерства польопривреди и защити животного штредку Влади Сербиї.
Олеяр поволал шицких Керестурцох же би фотоґрафовали, лєбо знїмали кажди виход кравох з фарми до польох и знїмки придали до МЗ, а як поведзене на схадзки Совиту, обачене же крави знова уходза до польох коло фарми и очкодовюю шаца.
