Юлияна Неваляного велї познаю по фотоґрафийох котри, остатнї даскельо роки, поряднє обявює на Фейсбуку. То углавним подїї котри самоинициятивно и зоз гобия провадзи и сликує. Окрем того же ма нєзвичайне и ридке презвиско, Юлиян ма и окремни попатрунок на швет коло себе, политику, спорт, медиї и фамелию.
Уж вецей як 30 роки Юлиян роби у Общей землєдїлскей задруґи у Коцуре, а фотоґрафованє му лєм гоби котри полюбел. Швет за обєктивом го зацикавел цалком случайно пред вецей як децению.
– Нє можем повесц же ми фотоґрафованє велька любов, або подобне, но при мнє то почало з якейшик потреби же бим тото цо ме интересує видзел таке яке є. Почнєм од початку…
Давно ме заинтересовали лїковити рошлїни, читал сом рижни кнїжки о нїх, вельо того сом научел, алє ме интересовало ище вецей од того цо сом пречитал. Вец сом по интернету глєдал дзепоєдни фотоґрафиї и нє могол сом их найсц, а кед же сом и нашол, слички були барз подлого квалитету, малей резолуциї. Так сом надумал сам справиц каталоґ рошлїнох, купел сом фотоапарат и рушел до природи. Повторюєм, то було пред 10 роками, и ище вше сом нє направел тот каталоґ, понеже ме фотоґрафованє одведло у цалком другим напряме о котрим сом анї нє роздумовал. Спочатку сом нє мал квалитетни фотоапарат, алє послужел и тот, диґитални, же бим на фотоґрафийох видзел тото цо сом жадал – здогадує ше Юлиян.
Фотоґрафовац почал спонтано, а нєшка го мож видзиц на каждей коцурскей, алє и других манифестацийох котри орґанизую нашо дружтва, а його фотоґрафиї и дожице подїї истого вечара у албуму на його профилу на Фейсбуку. Фотоґрафиї нє предава, ридко кеди вироби даєдни з нїх, алє ше цеши кед ше людзом пача.
– Мнє то наисце лєм гоби. Попри моєй роботи, уживанє ми нащивиц даяку манифестацию, и пре тото цо любим сом вельо раз и путовал зоз Руснацами, упознал велїх людзох, интересантни предїли, держави и шицки тоти путованя охабели на мнє красни упечатки. Дзекуюци нашим дружтвом котри сом провадзел и фотоґрафовал їх наступи на рижних фестивалох, видзел сом дзе Руснаци жию у Словацкей, Польскей и Мадярскей…
Инициятор того же би фотоґрафовал подїї на котрих участвую Рунаци, односно Коцурци, бул професор др Михайло Фейса, котри його способносци препознал и волал го же би провадзел подїї котри орґанизовал, перше КПД „ДОК”, а потим и други дружтва у Коцуре.
Провадзи коцурски здруженя и у иножемстве
ДВАЦЕЦ РОКИ НЄ ПАТРИ ТЕЛЕВИЗИЮ
Юлиян живот препровадзує у Коцуре, єдинєц є, жил зоз родичами, а понеже ше нє оженєл, за себе гвари же жиє як Робинзон Крусо, понеже нє ма анї телевизор, нє провадзи политику, анї спорт и пре шицко, як гвари, жиє мирнєйше, без нервози. Свой шлєбодни час препровадзує зоз приятелями, на друженьох, и у тим цо го виполнює, а найважнєйше му – же є шлєбодни чловек.
– Уж 20 роки нє мам дома телевизор. Нє интересує ме спорт, анї политика, анї дньово подїї. Мац док жила патрела телевизию и фуртом була нервозна и шицко ю дотикало… Я иншаки, провадзим и виберам тото цо ме интересує на интернету, та сом на одредзени способ нє одрезани од швета. Шицко цо жадам дознац, алє и цо нє жадам, та гоч ме анї нє интересує, дознам на Фейсбуку. Там шицко написане, алє мам шлєбоду вибрац же чи даяку вистку отворим и пречитам, чи нє. Иншак, думам же Фейсбук платформа, нєшка окремни медий, на котрим мож дознац вельо того, та так и я на интернету вельо того научел и о фотоґрафованю и о фотоапаратох – гвари Юлиян.
З гобия нє ма хасну, фотоґрафиї нє предава, дзелї их на дружтвеней мрежи задармо, а кажде хто жада опатриц же цо було пред даскельома роками на даякей подїї, може пойсц на його профил и у ґалериї фотоґрафийох и албумох, по датуме пошоровани, може найсц одредзени фестивал, схадзку, або концерт. Окрем ґалериї фотоґрафийох на Фейсбуку, о вистави своїх фотоґрафийох и шицкого цо през тоти 10 роки фотоґрафовал, Юлиян нє роздумує пре финансиї.
– Нє можем сиґурно твердзиц же чи бим ше жадал упущовац до такого дачого як цо то професийне фотоґрафованє. Нє сликуєм пре пенєж, нє предавам фотки на свадзбох и вешельох, а там мож заробиц… З другого боку, жадам буц шлєбодни, чи даґдзе пойдзем чи нє, завиши лєм од моєй добрей дзеки, а думам же кед бим константно на исту тему фотоґрафовал, же би ми допило. Так ходзим на подїї зоз култури, спорту, углавним у Коцуре, и кед ме волаю зоз даєдного нашого здруженя, а тото робим прето же любим – гвари Неваляни.
Як, уж спомнул, путовал з нашима здруженями, а вельке жаданє му одпутовац до Русиї и там зазначиц даяки памятки. Любел би частейше путовац по нашей жеми, алє и до иножемстве, но, затераз, тото остава лєм на жаданьох…
Кед слово о тим цо люби фотоґрафовац, нє вибера, люби шицко сликовац, и природу и людзох, нїч му нє чежко. Лєм ужива у тим цо роби.
НАЙВАЖНЄЙШЕ ОШТРЕ ОКО
Под час своєй фотоґрафскей роботи, пременєл даскельо фотоапарати, патрел же би кажди шлїдуюци апарат котри купи бул лєпши од предходного. До фотоапаратох ше вше баржей розуми, вельо виглєдовал по рижних сайтох и пречитал скоро шицки форуми о нїх.
– Кед сом менял апарат, вельо сом читал о каждим, совитовал сом ше зоз людзми котри у тей роботи професийно, або з гобия, а заш лєм сцу мац добри и квалитетни фотоґрафиї – гвари наш собешеднїк. За добру фотоґрафию, як гвари, нє найважнєйши драги фотоапарат, алє оштре око фотоґрафа котри лапи одредзену хвильку, угел, котри добре преценї шветлосц и кликнє праве теди кед треба застановиц час.
Гоч нїґда нє позно, Юлиян нє роздумує меняц професию и глєдац роботу у обласци фотоґрафиї. Остава у задруґи, чека пензию, а у медзичаше жиє свой живот у швеце фотоґрафиї и подїйох котри нащивює.
ДЗЕШЕЦРОЧНЕ СЛИКЕРСКЕ ИСКУСТВО
– За шицки тоти роки сом о фотоапаратох вельо научел, та и тото же меґапиксели нє пресудни же би фотоґрафиї були квалтетни. На квалитет фотоґрафиї вельо того вплївує, а кед слово о меґапикселох, за добру фотоґрафию досц же би фотоапарат мал 8, 10 або 12 меґапиксели. Но, перше треба патриц на два ствари – на велькосц сензору и обєктив фотоапарату – твердзи зоз искуства Неваляни.
З фотоапаратом обишол велї краї дзе жию нашо людзе