РУСКИ КЕРЕСТУР – Як перша представа з репертоару за одроснуту публику на ювилейним 50. Драмским мемориялу Петра Ризнича Дядї, одбавени „Ковалє” Милоша Николича, хтору пияток вечар виведол ансамбл РНТ „Петро Ризнич Дядя” з Руского Керестура, у режиї Владимира Надя Ачима, хтори подписує и преклад и адаптацию текста.
Гоч драмски фалат „Ковалє” жанровски стої як комедия – баржей диялоґу як ситуациї, ма и елементи фарсичного, алє и животней, еґзистенциялистичней драми хтора дотика найглїбши пасма цилю и сущносци чловекового єствованя на швеце.
З адаптацию обсяжни текст приспособени ґу штирочленому ґлумецкому ансамблу – Михал Варґа, Емил Няради, Ксения Макаї Орос и Любомир Дудаш, достал на динамичносци, алє му нє вжата вецейпасмовитосц – як глїбоко ше пойдзе у його розкруцаню, завиши лєм од инспирациї и надихнуца ґлумцох бо простору єст.
У форґове судьбох яки през ґенерациї може спричинїц лєм гаос як шветова война, заш лєм єст цошка бизовне, розумне и нєпременлїве, а то природа, закон живота и мацеринство, цо шицко зжате у улоги Луйзи хтору сиґурно одбавела Ксения Макаї Орос. У солидним ансаблу заш лєм ше визначел Михайло Варґа, хтори достал и награду фахового жирия за найлєпшу улогу.
У премиєрним виводзеню „Ковальох” у даскельо ситуацийох могло обачиц проблеми з ритмику представи, насампредз як ше идзе ґу климаксу, алє ше то без сумнїву виправи у шлїдуюцих виводзеньох. По шицким иншим то представа по мири, достаточно питка а нє поверхова, права за початок Мемориялу.
Вецей фотоґрафиї мож поопатрац у нашей фотоґалериї.
