БЕОҐРАД – Министерство здравя почало применьовац диґиталну технолоґию у своєй роботи, та лїкарски препатрунки мож заказац и прейґ апликациї вибрани дохтор на мобилним телефону.
Гражданом оможлївене безплатно превжац нову мобилну апликацию вибрани дохтор зоз Ґуґл плей предавальнї. Апликация дава три можлївосци – заказац препатрунок у вибраного дохтора, вибраного стоматолоґа и вибраного ґинеколоґа – виявел вчера Никола Радоман зоз Министерства здравя
Зоз єдним кликом мож видзиц шицки шлєбодни термини, а попри заказованя, препатрунки прейґ апликациї мож и одказац. Радоман гварел же апликация постала активна пред двома днями и же ю превжало вельке число людзох, а упечатки о нєй позитивни.