РУСКИ КЕРЕСТУР – Нєшка закончени єденасти по шоре Медзинародни волонтерски камп „На двох колєсох” у Керестуре, а домашнї волонтере и члени Туристичного здруженя Руски Керестур випровадзели госцуюцих волонтерох рано на 10 годзин.
Штварток, предостатнї дзень у кампу, волонтере були найвреднєйши, бо понагляли шицки бициґли оправиц, офарбиц и вирисовац з мотивами руских парткох.
Так, пияток пред поладньом, волонтере и вожели бициґли до чийого оправяня уложели двотижньови труд. На бициґлох ше превезли на рускокерестурки базен, дзе ше мали нагоду окупац, а потим и полудньовац. Рибаре, члени керестурского Здруженя спортских рибарох „Коляк”, обезпечели рибу, а члени Туристичного здруженя за нїх варели рибов котлїк.
Пре горучаву и червени метеоаларм, пополаднє препровадзели у спортскей гали дзе бавели дружтвени бависка. Пред вечаром, знова на бициґлох нащивели Водицу, дзе ше источашнє одвива Камп за дзеци, та мали нагоду упознац часц вирского живота Руснацох, и числених учашнїкох Водицового кампу.
Остатнї вечар сумировали упечатки з лидерами тогорочного кампу, домашню Ясну Медєши и Шпанцом Адрияном Фернандезом Лонґарелом, та з предсидательку Туристичного здруженя Любицу Няради.
– Тогорочни камп видвоїме як барз успишни, насампредз прето же настали нови товаришства, потвердзена толерантносц и виполнєти шицки задатки предвидзени з роботним планом Волонтерского кампу. Похвалєла бим шицких учашнїкох на отвореносци за упознаванє з иножемнима волонтерами, шицки волонтере ше успишно спорозумйовали на анґлийским язику, а нє з пантомиму – заключує Любица Няради.
Медзинародни волонтерски камп ше отримовал у рамикох оранизациї МВС – Младих виглєдовачох Сербиї, котра помогла з тим же обезпечели душеки за спанє волонтерох. Волонтере були змесцени у спортскей гали, а шицки активносци ше одвивали у просторийох Туристичного здруженя на Маковским шоре.
Вельку потримовку за отримованє Кампу дали и керестурски подприємства, поднїмателє, здруженя и числени гражданє як спонзоре.