НОВИ САД – Штварток, 17. мая, у Новим Садзе отримана Спортска олимпияда школскей младежи Войводини СОШОВ, на котрей участвовали Керестурци – Филип Будински, школяр шестей класи Основней школи „Петро Кузмяк” и штредньошколєц Дарян Белак, котри ше змага спред новосадскей штреднєй Транспортней школи „Пинки”.
Спортска олимпияда школскей младежи Войводини того року отримана осми раз, на святочним отвераню у велькей сали СПЕНС-у присуствовали вецей як 4 500 школяре и вецей як 1 000 професоре зоз цалей Войводини. Змаганя зоз атлетики отримани на новосадским стадиону „Карадьордє”.
Филип Будински завжал друге место у дисциплини руцаня кулї, а и Белакови ше удало освоїц стрибло у бежаню на 1 000 метери.
Будинския на змаганьох провадзела професорка физичного воспитаня у школи „Петро Кузмяк” и тренер Атлетского клубу „Русин”, Саня Тиркайла, а Белака пририхтал Душко Миличич тренер зоз Атлетского клубу „Войводина” з Нового Саду, цо и його матични клуб.
