НОВИ САД – Нєшка, 7. авґуста, у просторийох Заводу за културу войводянских Руснацох у Новим Садзе, отримана Конститутивна схадзка фахового роботного цела Координациї националних совитох, а за його предсидателя вибрани Хасим Мекич, предсидатель Вивершного одбору Бошняцкей националней ради.
У тим роботним целу спред Националного совиту (НС) Руснацох, як член Одбора за хаснованє язика и писма, Йоаким Грубеня, Слободан Ґолубович, предсидатель Одбору за образованє Влашкого националного совиту и спомнути Хасим Мекич.
У розгварки о одвитуюцей заступеносци припаднїкох националних меншинох у явним секторе и явних подприємствох Ґолубович спозорел же треба обявиц препатрунок стану на терену и статистични податки.
На схадзки бул и Желько Ковач, предсидатель Вивершного одбору НС Руснацох, хтори бешедовал о контексту у хторим чечу активносци Координациї националних совитох. Гварене и же ше предложи Координациї националних совитох схадзку у ресорним министерстве членох того роботного цела и представнїкох Координациї националних совитох.
– Конкретнєйши активносци на формованю того роботного цела Координациї почали на початку того мешаца. З часом, будзе ше одкривац и видзиц цо найлєпше за поєдини национални заєднїци и цо приоритети – гварел з тей нагоди Желько Ковач.