ЗОМБОР/РУСКИ КЕРЕСТУР – Рукометаше Рукометного клубу „Русин” до 14 рокох, внєдзелю 18. марца участвовали на турниру у Зомборе дзе одбавели два змаганя у рамикох Лиґи младших катеґорийох М14.
Перше змаганє процив екипи „Спартак Войпут” зоз Суботици Русиновци страцели зоз резултатом 16:8, гоч ше у першим полчасу досц добре тримали, други полчас бул досц нєвигодни за нїх, дошлєбодзели себе оддих процив професийней другопласованей екипи.
Друге змаганє на турниру бавели зоз екипу „Зомбор” котру Русиновци победзели зоз резултатом 13:10. Обчековац було же буду вичерпани после першого змаганя, но то бул лєм мотив же би и друге змаганє прешвечлїво одбавели, а цали час мали предносц.
За „Русин” бавели: Стойков (7), Гарди (4), Пашо (3), Планчак (1), Ґовля (1), Максимович (1), Накич (1), Накич (1), Няради (1), Бодянец (1), Надь (1), Чордаш, Ковачевич, а ґолманє були Зорич и Новта.
Екипа Русину ше и далєй находзи на штвартим месце зоз 6 бодами у ґрупи А, дзе после шейсц одбавених змаганьох маю зазначени три побиди и три пораженя, зоз розлику плус шейсц ґоли.
За тоти змаганя младих рукометашох Русину пририхтали Злата Паплацко и Владимир Планчак. Турнир 31. марца, у Лиґи младших катеґорийох М14, будзе бавени у Руским Керестуре.