РУСКИ КЕРЕСТУР – Основна и штредня школа з домом школярох „Петро Кузмяк” зоз интердисциплинарним Фестивалом науки означела свой Дзень у присустве школярох, наставнїкох, госцох з других школох и валалских установох и родичох.
У школским голу и кабинетох представени активносци и роботнї зоз шицких предметох, як з природних наукох од математики, физики, хемиї, биолоґиї по язики, руски и странски цо ше виучую у Школи, и музичну уметносц.
Директорка Школи Хелена Пашо Павлович винчуюци Дзень школи шицким присутним потолковала тогорочни иншаки концепт преслави. Вона наглашела же прировнуюци ше императиву часу же би Школа постала атрактивна и школяром и наставнїком, Школа „Петро Кузмяк” ше намага провадзиц тенденциї и розвой нашого дружтва и трима крочай зоз швидкима пременками у технїки и технолоґиї.
Спрам своїх афинитетох школяре на Фестивалу науки могли участвовац у роботньох и експериментох хтори ше им понукали зоз рижних предметох.