За Днї паприґи ище ше мож приявиц за варенє айвару

автор маф
1.1k Опатрене

РУСКИ КЕРЕСТУР – За тогорочну манифестацию Днї керестурскей паприґи, хтора будзе отримана 25. и 26. авґуста, звекшого шицко познате, и докончую ше остатнї пририхтованя – констатоване на схадзки Орґанизацийного одбору манифестациї отриманей 19. авґуста. Орґанизаторе ище лєм поволую заинтересованих за змаганє у вареню айвара же би ше цо скорей приявели.

На схадзки Орґанизацийного одбору попри представнїкох Здруженя паприґарох „Капсикум анум”, були присутни и представителє других валалских здруженьох и установох як цо „Байка”, Туристичне здруженє, Дом култури, Месна заєднїца, „Руском”, и представнїк погосцительох, хтори помагаю же би шицко добре функционовало.

Орґанизатор утвердзел же того року варенє рижних єдлох будзе у 14 котлох, цена порциї за векшину будзе 300 динари, а будзе ше вариц рибов котлїк, полнєта паприґа, капуста, паприґаш з баранїни и баранчецини, а з єленя будзе коштац 400 динари. Будзе и печеня и роштиль, а того року першираз и змаганє у вареню айвару за хторе потераз приявена екипа з Парачину и два домашнї екипи.

Буду отримани и шицки плановани и обявени змисти, од нащиви двох польох з паприґу по културно-забавни змисти, а од 16 годзин нащивителє манифестациї годни опатриц и Музейну збирку у Замку.

ПОВЯЗАНИ ТЕКСТИ