ШИД – Вчера почала акция транспортней полициї Полицийней станїци (ПС) Шид за векшу безпечносц бициґлистох, котри єдна зоз загрожених катеґорийох учашнїкох у транспорту, а тирва по 15. юлий. Акцию потримали Скупштина општини Шид и єй Комисия за безпечносц транспорту.
Як виявел командир Полцийней станїци Зоран Вуколич, бициґлистом буду дзелєни едукативни флаєри и характеристични жовто-били лайбик пре лєпшу обачлївосц, як и сиґнализация, ткв. „мачи очи“.
Представительом месних заєднїцох, бициґлистичних клубох, Червеного крижу и другим, у сали Скупштини општини Шид отримане едукативне преподаванє на тоту тему, на хторим помоцнїк командира ПС задлужени за безпечносц транспорту Радивой Дабич гварел же у шидскей општини за перши шейсц мешаци того року нє було транспортни нєщесца з погинутим особами, алє скорей було и вецей погинутих бициґлистох.
На початку акциї патрола транспортней полициї у Карадьрдьивей улїци у Шидзе бициґлистом дзелєла опрему и флаєри, обезпечени у сотруднїцтве з Мисию ОЕБС-у у Сербиї, хтора потримала акцию.