БЕОҐРАД – Як предложене на схадзки у Министерстве култури и информованя з представителями националниох совитох националних меншинох у Сербиї, хтора у Беоґрадзе отримана штварток, 30. марца, по новим законє о явним информованю и медийох општини и городи буду обовязни з найменєй 1 осто зоз свойого цалосного буджету софинансовац проєкти з обласци информованя у локалним штредку.
Попри дефинованя спомнутого проценту, цо дотераз нє було, у новим законє буду дефиновани и термини кеди локални самоуправи маю розписац конкурса за проєкти з обласци информованя, же би медиї на локалним уровню, та и хтори информую на язикох националних меншинох, од початку буджетного рока мали средства за проєкти явного инфмормованя.
Схадзку о проєктним софинансованю и других питаньох значних за витворйованє правох националних меншинох у обласци явного информованя зволал державни секретар у Министерстве култури и информованя Нино Брайович, а у мено Националного совиту (НС) Руснацох на схадзки присуствовали членїца Одбору за информованє НС Анамария Ранкович и директорка НВУ „Руске слово” и предсидателька НАР-у Мартица Тамаш.
Представителє совитох предложели же би ше у рамикох Радио-телевизиї Сербиї (РТС) основало редакцию на язикох националних меншинох, а од Министерства култури и информованя вимагаю и потримовку у провадзеню законскей обовязки о почитованю програмней шеми после приватизованя медию.
Державни секретар Брайович гварел же за информованє на язикох националних меншинох у 2016. року з републичного буджету и буджету АП Войводини видвоєне вецей пенєжи як за други медиї, нє рахуюци буджетни видвойованя за явни сервиси.
Меншински медиї достаню коло 305 милиони динари, односно 33 одсто вецей як други медиї, хтори достаню 215 милиони динари. Таки тренд будзе предлужени и надалєй, як и почитованє високих стандардох кед у питаню информованє на язикох националних меншинох, визначел Брайович.