За каждого нового роботнїка 200 тисячи динари

автор днв/мар
941 Опатрене

НОВИ САД – Город Нови Сад розписал явну поволанку за додзельованє субвенцийох за отверанє нових роботних местох. Субвенциї буду єднократни 200 000 динари по роботним месце, а конкурс отворени по 30 юний.

Право на субвенциї маю роботодавателє зоз шедзиском на териториї Нового Саду, под условийом кед обезпеча роботу за нєзанятих з евиденциї новосадскей Филияли Националней служби за обезпечованє роботи и то на новоотвореним роботним месце, з полним роботним часом.

Попри тим, приватнїк муши буц реґистровани найменєй три мешаци пред подношеньом вимоги за субвенцию, нє шме дац роботне место особи котра була занята у подприємстве найменєй три мешаци пред приявйованя за субвенцию, а нови роботнїк нє шме буц повязани з ґаздом. Од роботодавателя ше обчекує же нє одпущовал роботнїкох найменєй три мешаци пред конкурованьом.

Приоритет за сувенциї буду мац роботодавателє котри обезпеча роботу за гражданох з ґрупох котри чежше находза роботу.

Роботодаватель треба же би поднєсол вимогу з бизнис планом, потвердзенє же нє зменшал число занятих за остатнї три мешаци пред подношеньом вимоги и же поряднє виплацує обовязки и поглєдованя спрам Городу и Националней служби за обезпечованє роботи.

Информациї о субвенцийох за отверанє нових роботних местох мож найсц на сайту www.novisad.rs.

ПОВЯЗАНИ ТЕКСТИ