За перше дзецко сто тисячи динари

автор днв/мар
1.1k Опатрене

СЕРБИЯ – Вименєни Закон о финансийней потримовки фамелийом з дзецми би мал буц прилапени до конца рока, по хторим Министерство за роботу, обезпечованє роботи, борецки и социялни питаня планує звекшац родительски додаток за родзенє дзецка. Так за перше дзецко з буджету буду виплацовани єднократни 100 000 динари, а будзе звекшане и надполнєнє за друге, треце и штварте дзецко.

За перше дзецко дотерашнї додаток бул 39 345,83 динари, 153 857 динари за друге, 276 930 динари за треце и 369 236 динари за штварте народзене дзецко. До тераз тот додаток бул виплацовани єднократно за перше, док за друге, треце и штварте дзецко у 24-ох єднаких мешачних ратох.

Мешачна рата родительского додатку за друге дзецко виноши 6 410,71 динар, за треце 11 538,75, а за штварте 15 384,84 динари. Як поведзене з Министерства, тоти пенєжи и далєй буду виплацовани у 24-ох мешачних ратох, а буду и дакус звекшани.

З Министерства наявюю же дзепоєдни одреднїци того Закона буду вименєни, так же би тото право могли витвориц и странски гражданки з пребуваньом на териториї Сербиї, та и оцове, кед же мацери дзецкох странски державянки.

ПОВЯЗАНИ ТЕКСТИ