РУСКИ КЕРЕСТУР − За розгартанє шнїгу у Руским Керестуре задлужене ЯКП „Комуналєц” зоз Кули, а з першим шнїгом на терен вишли жимски служби у шицких местох општини.
Шнїг почал падац вчера коло поладня, алє ше нє затримовал на жеми аж до вечара. Теди реаґовала жимска служба ЯП „Бачка пут” котра посипала улїцу Маршала Тита зоз солю и ризлу.
Познєйше, Комуналєц посипал соль и ризлу, та окончел и перше розгартанє шнїгу по векших улїцох у валалє. Ґу роботом ше приключело и ЯКП „Руском” зоз власним трактором и розгартачку за шнїг, потолковал за Рутенпрес, директор „Рускому” Иґор Фейди, и наглашел же ше рано од 4 годзин предлужи з дальшим розгартаньом.