БЕОҐРАД – Внєдзелю, 12. марца на пол ноци вишол термин за придаванє кандидатурох за участвованє на виберанкох за предсидателя Сербиї, и до Републичней виберанковей комисиї (РВК) сцигли 12 кандидатури. Вчера през дзень РВК преглашела ище трох кандидатох – Ненада Чанка, Мирослава Паровича и Милана Стаматовича, а вечар, з векшину гласох, и Луку Максимовича, алияс Любишу Прелетачевича Билого.
Стаматовича предложела Ґрупа гражданох „За здраву Сербию” и мал 12 027 валидни подписи потримовки, Парович кандидат Народного слободарского руху, котри назберал 10 390 правно важаци подписи, Чанка предложела Лиґа социялдемократох Войводини (ЛСВ) и мал 11 004 валидни подписи потримовки гражданох, а Луку Максимовича-Любишу Прелетачевича Билого Ґрупа гражданох „Любиша Прелетачевич Били-Лєм моцно”, зоз 12 610 подписами потримовки.
Ище скорей як кандидати потвердзени Александар Вучич спред владаюцей коалициї, Саша Янкович спред Ґрупи гражданох „За Сербию без страху”, Воїслав Шешель спред Сербскей радикалней странки и Вук Єремича, спред Ґрупа гражданох „Мушиме лєпше”.