Шаховски клуб „Русин” з Руского Керестура нєдавно закончел тогорочну полусезону у штредку таблїчки у Медзиопштинскей лиґи Зомбор. То найнїзши ранґ змаганя, алє за тот нєдавно обновени клуб то барз добри резултат, як гвари його предсидатель Михайло Венчельовски.
Шаховски клуб „Русин” обновени пред двома роками, а по осем-дзевец рокох паузи. Єден з иницияторох того бул праве його предсидатель.
– Полусезона закончена 11. юния, завжали зме 4. место од 8 екипох у лиґи, з тим же зме у остатнїм колє од Сивцу дожили пораженє хторе зме нє обчековали. Ту кед бизме побили, на цо зме и раховали, алє було цалком иншак, та бизме закончели на другим месце, цо би було барз добре, алє и штварте место добре. Од штирох колох посцигли зме два побиди и два пораженя – гвари Венчельовски.
РЕАЛНИ АМБИЦИЇ
Кед слово о планох за наиходзацу сезону, та и за далєй, Венчельовски гвари же до висшого ранґу змаганя преходзи лєм першопласовани клуб, а їх амбициї по питаню кавилетета реални.
– Думам же ми ище нєдоросли за висшу лиґу. Ище ше лєм консолидуєме, убавюєме, маме старших искуснєйших бавячох, як Рафаил Венчельовски, Янко Катрина и други, а пришли и младши добри шахисти, як Мирко Афич, Евґениє Медєши. Маме дас 10 активних бавячох, а вєдно коло 20 хтори приходза кед бавиме першенство Керестура цо зме уж два роки орґанизовали. Валалски турнир думаме и того року орґанизовац даґдзе концом рока кед людзе маю вецей часу. Обидва роки зме участвовали и на турнире СБ „Яша Баков” гоч нам нє барз одвитує же ше отримує праве у чаше кед и першенство – гварел Венчельовски.
Шицки спортски клуби у Керестуре кубуря и зоз финансийнима средствами, як у тей часци функционую шахисти, Михайло толкує же им того року лєгчейше, бо маю право на финансованє. Уж достали средства зоз општини, а требало би и зоз Месней заєднїци.
– За тераз, у тей сезони, єдноставнєйше було ходзиц на змаганя хтори зме влонї финансовали зоз своїх кишенкох, бо таки правила за першу сезону змаганьох. Нам анї нє потребни даяки вельки пенєж. Од дакедишнього Клубу зме нашлїдзели шейсц табли и годзинки котри нєобходни за змаганя, та тото основне маме. Гоч би добре було обновиц фиґури, а купиц ище даєдну годзинку, та кед годно и того року дацо докупиме – наглашел предсидатель керестурских шахистох.
Михайло Венчельовски
НЄТ МЛАДИХ И МАЛИХ ШАХИСТОХ
Як и у шицким, и у шаху швет на младих остава, алє як ствари стоя, у керестурским Клубу на тим ище мало поробене. Здогадуєме ше же Клуб влонї порушал шаховску секцию у Школи „Петро Кузмяк” хтора тиж нєактивна одкеди до пензиї пошол професор Иван Пап. Но, по словох, Венчельовского, було лєм трох-штирох заинтересованих школярох, пришол розпуст и робота нє предлужена.
– То велька чкода, алє дзеци нєшка маю вельо други интересованя. Мали зме єден час и даскельо штредньошколцох цо у Клубу почали тренирац, могли постац добри шахисти, алє и вони нє витримали. За даяку активну промоцию шаху при младих ґенерацийох требал би насампредз дахто вельо пошвециц свой час, требало би за нїх и турнири орґанизовац же би ше даґдзе могли змагац, бо нєт першенства за млади возрости. То знова шицко вимага и пенєж, та нє знам чи за таке дацо маме моци.
ШАХ РОЗВИВА ЛОҐИЧНЕ РОЗДУМОВАНЄ
– Шицких цо любя шах або су заинтересовани научиц вецей, поволуєме присц на нашо тренинґи хтори штвартками коло 21 годзин, у просторийох СД „Русин” у Старей школи. У юлию будзе пауза, а вец од половки авґуста знова починаме. Можу присц шицки ґенерациї од школярох, штредньошколцох по старших, а бавиц мож и рекреативно, бо шах насампредз доприноши лєпшому роздумованю, лоґичному и математичному заключованю и подобне.
ЛЮБОВ ОДМАЛЮЧКА
Терашнї предсидатель ШК „Русин” Михайло Венчельовски шахиста одмалючка. Шах полюбел припатраюци ше на оца Дюру и бачика Рафаила, а вец ше у школи уключел и до шаховскей секциї.
– Водзел нас длуго професор Иван Пап, а дакус и Раде Пап. Як омладинєц сом участвовал на Омладинским першенстве раз у Керестуре, даґдзе 1999. Року, вец и у Суботици. А од 2002. по 2005. бавел сом на омладинскей табли у ШК „Русин”, хтори ше о рок загашел, та так и я теди активно престал бавиц.