НОВИ САД – Розвойни фонд Войводини (РФВ) обезпечел за тот рок 2,5 милиярди динари за финансованє привреди и польопривреднїкох у Сербиї.
РФВ за тот рок пририхтал и нови конкурси, попри уж иснуюцих кредитних линийох, та так єдна кредитна линия наменєна инвестицийом у польопривреди у рамикох ИПАРД програми, а друга розвою туризма.
Директор фонда Ґоран Савич толкує же конкурсни линиї оформени у першим шоре як продукт сотруднїцтва Розвойного фонду и привреднїкох и польопривреднїкох на терену.
РФВ иншак ма найнїзши камати на тарґовищу и вони ше рушаю од єден до три одсто, гвари Савич за Танюґ.
Хаснователє кредитох за инвестициї у польопривреди, у рамикох ИПАРД програми можу буц шицки тоти хтори уписани до Реґистру польопривредних ґаздовствох, физични особи, ношителє комерциялного фамелийного ґаздовства, поднїмателє, як и привредни дружтва и землєдїлски задруґи.
Найглєданши кредити, гвари Савич, тоти за купованє новей опреми и машинох, алє наглашує же РФВ нєзадовольни з прешлорочним поцагованьом средствох зоз Фонду кед польопривреднїки и привреднїки достали коло милиярду динари.