Здобуванє искуства

автор иван сабадош
925 Опатрене

Принцип проєктного финансованя по конкурсох през остатнї даскельо роки надрилєл ше як доминантни способ финансованя, та и функционованя широкого спектра дїялносцох у явней сфери. Поправдзе, нє вше видно же прецо є лєпши, окрем же то европска пракса, як дакедишнї „буджетни” модел. Прето велїх ище вше горучка облїва на сам спомин проєктох, конкурсох, фондованьох, евалуацийох и апликацийох, а становиско же „дай бо ми треба, цо ци мам толковац же нач” глїбоко укоренєне. Медзитим, треба прилапиц же пошвидко скоро шицко будзе функционовац по тим моделу, голєм покля ше нє зяви даяка нова парадиґма.

Того року, Одбор за културу першираз пенєж за потримовку програмом секцийох наших културно-уметнїцких дружтвох розподзелєл по проєктним моделу. Слово о милион и пол динарох, цо скоро цали буджет того Одбору, хтори наменєни за потримовку дружтвом у пририхтованю за руски национални фестивали и манифестациї. Од скоро 50 проєктох кельо сцигли на Конкурс Одбору за културу, найвекша часц барз скромного квалитету. Лєм даскельо викрочели понад формалного минимуму, односно же окрем  правилно виполнєней апликациї и прияви у конкурсним термину, наисце арґументую прецо их треба софинансовац, и на яки способ унапредза  творчосц Руснацох у обласци виводзацкей и фестивалскей култури. У оштрейшей конкуренциї на даяким отвореним конкурсу – општинским, городским лєбо покраїнским, дзе саме апликованє нє ґарантує и доставанє финансийней потримовки, лєм тоти даскельо би евентуално мали шансу.

Медзитим, понеже слово о першим пробованю, Одбор проєкти роштовал през наисце ридку рошту. Скоро шицки достали подєднаку финансийну потримовку, правда нє таку як обчековали и яку дзепоєдни наисце и заслужую. Найважнєйше же би нашо локални дружтва такой на початку нє страцели мотив за писанє проєктох, алє здобули перши искуства як ше то роби. То  дополнююце обтерхованє за наших аматерох, алє уж шлїдуюци раз будзе исц лєгчейше.

У шлїдуюцих проєктних циклусох вшелїяк ше буду формовац озбильнєйши и прецизнєйши критериюми квалитету, дзе тоти цо ше баржей трудза и вецей робя, цо су креативнєйши и иновативнєйших, вецей и достаню. То би на концу концох  мала и буц сущносц проєктного финансованя.

ПОВЯЗАНИ ТЕКСТИ