РУСКИ КЕРЕСТУР – Здруженє женох „Байка” 6. марца отримало Рочну скупштину на хторей було бешеди о тим цо витворене у прешлим року, о планох за тот рок, як и о финансийох Здруженя.
Звит о роботи и планох поднєсла предсидателька Здруженя Славица Катона. И влонї „Байка” була активна як орґанизатор двох манифестацийох, нащивела даскельо манифестациї и подобни здруженя и роботнї у других местох, виробела вельо специфични ручни роботи.
Як наглашела Катонова, влонї було менєй проєкти, чувствує ше нєдостаток пенєжу и пре нови способ финансованя, односно нєдостаток пенєжу з месного самодоприносу, цо було основа за роботу Здруженя.
Финансийни звит поднєсла заменїца предсидательки Наталия Емейди, хтора визначела же влонї витворени лєм два проєкти, цо вельо менєй як скорей, а достати пенєж и потрошени. Од предатих продуктох витворени коло 300 тисячи динари, найвецей членїци „Байки”, а саме Здруженє мало менши заробок од сувенирох и жимнїци.
У планох за тот рок, Катонова визначела потребу конкуровац на вецей проєкти, и предлужиц шицки стаємни активносци прейґ хторих „Байка” промовує руску културу, традицию и руски стародавни єдла.