Знак за початок школи, чи векер за будзенє

автор борис варґа
773 Опатрене

Перши школски бренчок за школярох лєм єдно значи: початок школского року и здобуванє єдного з найдрагоцинших ресурсох – образованя.

Медзитим, перши школски бренчок старши иншак доживюю. Поготов того року. У просвитней сфери Сербиї обчекує ше длуго наявйована рационализация, а яґда же постанє нєизвесна судьба вецей тисячох просвитних кадрох. Влада ше поволує на спозорйованя з ММФ-у у вязи рационализациї роботних местох, а знаме же то лєм суґестиї. На власцох як зорґанизую дежаву.

Синдикати уж на початку школского року наявели штрайк. Спомина ше гашенє 800 оддзелєньох, алє Министерство просвити опомина же ше роками правело „фалшиви класи”, же би ше зачувало роботни места.

Атмосфера общей кризи школства у Сербиї цалком одражує кризу образованя по руски. У Дюрдьове ознова нє будзе руского оддзелєня у основней школи, а по першираз под знаком питаня и предшколске мишане оддзелєнє, дзе ше роби и по руски. У Руским Керестуре ше (по виход того числа) чека одвит же чи буду два одзелєня перших класох, чи лєм єдно.

Як дознавама зоз Одбору за образованє Националного совиту Руснацох, у Сриме тиж проблем зоз виучованьом руского язика. Єдина учителька, котра наставу викладала у Шидзе, Бачинцох и Бикичу, нїби то, послата на биро як технолоґийни звишок.

Питанє руского оддзелєня остатнї роки ше отвера и у Коцуре, так же пре обєктивни и субєктивни причини, озбильно загрожени заварти циклус образованя по руски – од яшелькох по факултет.

Право на образованє Руснацох у Сербиї було далєко на висшим уровню од державох на Горнїци, дзе ше лєм уводзи и розвива наставу по руски. И у сушедней Горватскей є нє на таким уровню як у нас.

Алє, основа того проблему то – кельо ми право хторе зме нашлїдзели з бувшей Титовей Югославиї порихтани и надалєй хасновац? Чи упишеме своїх найблїзших до оддзелєньох на мацеринским язику? Яґда вше менєй.

И випатра як кед би шицки Руснаци, з рижних жемох, помали приходзели на подобни уровень сполньованя права на образованє – гевти з Горнїци ше покус виборюю за свойо школство, а ми го, ту у Войводини вше баржей трациме.

Пишце нам – ruske.redaktor@gmail.com

ПОВЯЗАНИ ТЕКСТИ