КУЛА – У Културним центре Кула вчера, 10. марца, отримана Општинска смотра рецитаторох з назву „Максим Єкнич”, хторей домашнї були КУД „Крущич” з Крущичу, Културни центер Кула и Културно-просвитна заєднїца Општини Кула.
Змагали ше 34-еро рецитаторе у трох возростох – 12-еро у младшим (школяре нїзших класох ОШ), 13-еро у штреднїм (школяре висших класох ОШ) и 9-еро у старшим возросту (штредньошколци, студенти и други), а медзи нїма и осмеро рецитаторе з Руского Керестура.
У младшим возросту перше место освоєла Александра Ковиянич, друге Биляна Митрич, обидва з Кули, а треце место завжала Ема Живкович з Керестура. Попри нїх, на Зонску смотру ше пласовали и Желяна Янкович и Лука Ноґавица.
У штреднїм возросту перше место освоєла Владица Кляїч з Червинки, друге Лїляна Кнежевич з Кули, а треце Валентина Новта з Керестура. На Зонску смотру ше пласовал и Матей Шепински з Керестура и Тара Божович з Кули.
У старшим возросту, дзе и того року була моцна конкуренция, перше место освоєл Мирослав Малацко з Керестура, друге Катарина Перович, а треце Стефан Ковиянич, обидвойо з Кули. Попри нїх, на Зонску смотру ше пласовали и Павлина Шепински з Керестура, та Стася Дурутович з Червинки и Сузана Тошич з Кули.
Попри спомнутих, з Руского Керестура на Општинскей смотри участвовали и Иван Планчак и Марко Ковачевич у младшим, та Никола Марянович у штреднїм возросту.
Рецитаторох на Општинскей смотри оценьовал селектор Миодраґ Петрович, ґлумец Сербского народного театру з Новго Саду, з помоцу консултантох – Михайла Зазуляка за руски и Юлиї Дороґгази Киш за мадярски язик. Госц бул писатель Давид Кецман Дако зоз Зомбора.
Зонска смотра за рецитаторох зоз Заходнобачкого и Южнобачкого округу будзе 18. и 19. марца у Бачу.
