Початком 2016. року сайт достал нови випатрунок, шицки виданя Установи свойо место, а сайт апликацию. Отворели зме и интернет кнїжкарню, а скоро пол милиони нащиви сайту потвердзую же ше нашо читаче кажди дзень врацаю и вибераю змисти хторим веря.
Интеґровани сайт, на хторим ше находза шицки виданя Новинско-видавательней установи „Руске слово”, од самого початку 2016. року указовал же ше идзе у добрим напряме. Гоч ше през рок дацо престало обявйовац, а дацо почало, опатрени скоро пол милиони рижни тексти и информациї.
Вшелїяк же найопатранши информациї обявени на боку Новинскей аґенциї „Рутенпрес”, котра и пририхтує вистки на каждодньовим уровню. Як порядна дїялносц НВУ „Руске слово”, Рутенпрес и далєй бул найдовирлївше и найвецей преношене урядове жридло информованя у тей обласци при Руснацох. Нє менєй читани анї тексти з новинох „Руске слово”, окреме авторски тексти наших новинарох, розгварки и животни приповедки. Найчитанши тексти на сайту були тексти о траґичних подїїйох – вистку о шмерци Юлияна Рамача Чаму пречитало ше 2 350 раз, а информациї о двох огньох у Руским Керестуре коло 1 400 раз.
Же бизме лєгчейше дошли до читачох хаснуєме и дружтвену мрежу Фейсбук хтору провадза скоро тисяч особи, а коло 75 000 раз з нєй кликнуте на рижни тексти.
Як єден од значнєйших викрокох у роботи то и правенє нашей апликациї за мобилни телефони, у тим случаю за андроид оперативну систему, та ше можеме цешиц же нашо вистки доступни на скоро шицких платформох.
И у тим року нащивителє любели опатрац фотоґрафиї з наших манифестацийох, а нє треба прескочиц анї сотруднїцтво хторе порушане на нашу инициятиву зоз Заводом за културу войводянских Руснацох и Покраїнским заводом за защиту памятнїкох з хторим зме жадали помогнуц у идентификованю особох на старих фотоґрафийох хтори настали у дакедишнєй фотоґрафскей роботнї Бруґошових у Руским Керестуре. Фото-ґалерия „Огляднуце на прешлосц” опатрена скоро 800 раз.
Новини „Руске слово” зме у електронскей форми и прешлого року кладли каждого штвартку у пдф формату и на шветову електронску видавательну платформу ISSUU, прейґ хторей нас провадзи одредзене число читачох. Свойо ISSUU боки маю и МАК, дзецински часопис „Заградка” и часопис за литературу, културу и уметносц „Шветлосц”.
Вєшенї, после вецеймешачного пририхтованя, почала робиц наша интернет кнїжкарня на хторей мож купиц 90 виданя, и затераз уж предати даскельо кнїжки.
Нє треба забуц анї на рубрику Блоґи хтора нєдавно зажила. То авторски тексти и становиска о одредзених темох, и нашо читаче ше уж помали и звикли же и тоти тексти можу поряднє читац на сайту.
Тото цо найновше, то наградни конкурс за найлєпши рецепт хтори порушани 15. децембра, а тирва до 15. януара. У нїм ше у трох кругох нашо читаче змагаю хто достанє найвецей лайки за свой рецепт прейґ дружтвеней мрежи Фейсбук, одволанє барз добре, та у наиходзацим периодзе сиґурно порушаме ище вецей тематски проєкти до хторих буду уключени нашо читаче.
ОБЯВЕНИ ВЕЦЕЙ ЯК 50 000 ВИСТКИ
Прешлого року, 15. мая, Новинска аґенция „Рутенпрес” наполнєла 10 роки роботи. Од самого початку, на Рутенпресу обявйовани вистки на дньовим уровню, а дзепоєдни вистки ше каждодньово преклада и на сербски язик. Окрем информацийох зоз скоро шицких наших местох, обявйовани и информациї зоз ширшей заєднїци, рижни конкурси, обвисценя и други актуалносци.