РУСКИ КЕРЕСТУР/КОЦУР – У рамикох штиродньового означованя 125-рочнїци снованя своєй заєднїци, як и 70-рочнїци своєй Вице-провинциї св. Осифа у Сербиї. шестри Служебнїци Непорочней Дїви Мариї вчера, 16. марца, у Руским Керестуре мали стретнуце зоз свою ґенералну настоятельку Терезу Слота з Риму, котра им подаровала икону блаженей Йосафати, а у мено шестрох ю прияла Провинцийна настоятелька Мартина Кмита. Шицки шестри Служебнїци достали ювилейну швичку.
Нєшка, 17. марца, шестри одходза на паломнїцтво до Крижевцох, дзе 1906. року почали свою мисию на тих просторох, а там ше стретню и з крижевским владиком Николом Кекичом.
На ютре, 18. марца, после духовней програми у Провинцийним доме у Керестуре, ювилей шестрох будзе означени у Коцуре, дзе у сали Месней заєднїци на 15,20 годзин будзе промоция Фотомоноґрафиї „Сто роки шестрох Служебнїцох у Коцуре“.
Авторка Фотомоноґрафиї шестра Михаила, у кнїжки облапени период живота шестрох у манастире у Коцуре од 1915. по 2015. рок, а найстарша обявена фотоґрафия у нєй з 1915. року.
У рамикох промоциї, у Месней заєднїци будзе и вистава малюнкох з тему живота шестрох Служебнїцох у манастире, хтори намальовали дзеци на подобовей роботнї коцурского Здруженя младих „КУМ“, а шицки нащивителє достаню по прикладнїк Фотомоноґрафиї.
После промоциї шестри и вирни ше на Вельким, потим и на Старим теметове у Коцуре помодля за покойни шестри и добродїйох о. Андрея Лабоша и Дионизия Дороґхазия, а на 17,30 у грекокатолїцкей церкви будзе Вечурня. На шицки подїї поволани парохиянє и шицки заинтересовани.
Централна програма шветочносци з нагоди ювилею шестрох Служебнїцох Непорочней Дїви Мариї, источашнє и закончуюца, будзе на нєдзелю, 19. марца, на Архиєрейскей Служби Божей у Катедралней церкви св. оца Миколая у Руским Керестуре.