На сайту Новинарскей асоцияциї Руснацох (НАР – https://nar.org.rs/portfolio-item/edukacija/), у катеґориї „Нашо проєкти” – „Руски вертикали” – „Руски портал култури”, нєдавно ше зявел список вецей дзешатки менох и їх биоґрафийох по сербски. Окрем того же долу наведзена ище єдна катеґория – „Визначни Руснаци” и же у уводу пише хто и за чийо средства ше реализує тот проєкт, остава заш лєм нє цалком транспарентне и ясне по яких критериюмох тот список биоґрафийох направени, односно – як и хто го направел (комисия, поєдинци)?
Тот список вошол и до фокусу стаємних колумнох, „Становиска”. О нїм у 5. чишлє „Руского слова” писал Мирон Джуня, а у тим реаґує Михал Рамач. Тема вироятно порушала Єлену Перкович, котра пише текст за колумну „Анатомия” (опать на 2. боку).
Ширше патрено, случай „список” порушал єден проблем котри системно потрафя рускоязичну заєднїцу, окреме кед слово о визначованю и наградзованю.
Перше – без ясних критериюмох грамоти у рускей заєднїци додзелюю велї. Национални совит Руснацох у двох габох так подзелєл припознаня, Дружтво за руски язик то роби частейше и масовнєйше, „Руске слово” з часу на час и без стаємних правилох. За младих було и припознанє „Най Руснак”…
Кед слово о етики, на тим сайту такой пада до оч же два особи, котри наведзени як учашнїки тима на спомнутим проєкту, источашнє и на списку „Визначних Руснацох”. О синдрому зраженя интересох у рускей заєднїци сом тельо писал же сом уж сам себе допил. Прето, нє верим же ту „нєвидлїва комисия” будзе обєктивна.
Друге, олєгко себе дзепоєдни даваю за право людзох з меном и презвиском (живих, або покойних) национално етикетизовац.
Кажде визначованє, або наградзованє особох треба же би указовало на тото за яки ше дружтвени и културни вредносци одредзена заєднїца заклада.
Єдни ше трапя: чи глєдац „визначних Руснацох” котри дали свойо доприношнє рускей и ширшей заєднїци, чи визначиц поєдинцох зоз ширшей заєднїци (поведзме з Прибалтику, Шкотскей, або Япону) цо допринєсли рускей култури?
Док други до своєй правоти нє маю дилеми: так єден професор з рускей заєднїци прейґ орґанизациї, котру тиж очолює, 2011. видал мурови календар. На нїм вон положел фотоґрафиї визначних Руснацох – себе, Костельника, Духновича, Воргола…
Нє шмишне, бо и НАР шицким, окреме младим, понука шансу же би ше им мено нашло на списку коло Духновичового, або Ворголового з отворену поволанку за посиланє биоґрафийох котра ше находзи у тим чишлє на 17. боку.