БЕОҐРАД – На основи анализох традицийних друкованих и електронских медийох на меншинских язикох Калмана Кунтича, онлайн-медийох на меншинских язикох Мирослава Кевеждия и резултатох теренского виглєдованя меншинских и вецейязичних медийох Владимира Илича, вовторок, 28. марца, у Беоґрадзе отримана конференция з назву „Информованє на язикох националних меншинох – децению познєйше”.
Кед слово онлайн-медийох, Мирослав Кевежди визначел же вони тунї и вигодни способ информованя за национални меншини, бо за мали пенєж рижни снователє можу направиц медиї, и кед их реґиструю, можу участвовац на конкурсох локалних самоуправох.
На конференциї бешедоване и о других темох вязаних за информованє на язикох меншинох, як цо то Поглавє 23, проблематични медийни закони, приватизация медийох и подобним.
Шицки три виглєдованя о хторих бешедоване би у априлу мали буц и видруковани, а потим плановани ище три трибини, як и творенє новей медийней стратеґиї.
Сход орґанизовал Центер за розвой цивилного дружтва, а з потримовку Фондациї за отворене дружтво.