КОЦУР – У рамикох 27. Спортских бавискох „Яша Баков” у Коцуре, всоботу и внєдзелю, отримани Турнир у фодбалу за сениорох.
На турниру попри домашнього ФК „Искра” участвовали и ФК „Русин” зоз Руского Керестура, ФК „Бачка 1923” зоз Дюрдьова и ОФК „Бикич” зоз Бикичу.
Всоботу на програми бул полуфинални змаганя. У першим полуфиналним змаганю у котрим бавели „Русин” и „Бачка” Керестурци були лєпши и победзели зоз 3:0. У другим полуфиналним змаганю „Искра” победзела ОФК „Бикич” зоз 1:0.
Внєдзелю у интересантним змаганю за треце место „Бачка” зоз Дюрдьова победзела ОФК „Бикич” зоз 5:3, а у финалу у дербию „Искра” прешвечлїво зоз 5:0 победзела „Русин” зоз Руского Керестура.
По законченю турнира преглашени и найлєпши поєдинци. За найлєпшого бавяча преглашени Павле Дякович зоз „Искри”, найлєпши ґолман Йовица Калинич, тиж член коцурского клуба, а найлєпши стрилєц зоз трома датима ґолами Деян Добрич зоз ОФК „Бикич”.