Ище нє познате число змагательох за глас на „Ружи”

автор зам
1k Опатрене

РУСКИ КЕРЕСТУР – Як познате, 56. Фестивал рускей култури „Червена ружа” у Руским Керестуре будзе отримани 30. юния, 1. и 2. юлия, а на вчерайшей схадзки Програмного одбору Фестивалу з векшей часци утвердзени програми манифестацийох тогорочней „Ружи”.

На схадзки винєшене же на Фестивалє будзе орґанизована вистава роботох зоз шветово познатей Ґалериї наївней уметносци з Ковачици, цо будзе витворене прейґ сотруднїцтва заводох за културу войводянских Руснацох и войводянских Словацох, а вистава будзе отворена перши дзень Фестивалу, на пияток, 30. юния.

Исти дзень пред вечаром будзе манифестация дзецох „Черене пупче”, алє того року без змаганя нових композицийох за глас, понеже з 5 нових шпиванкох кельо сцигли на конкурс, за виводзенє три композициї. Догварене же би нашо КУД на „Пупчу” участвовали з найменєй по єдну шпиванку за дзеци зоз скорейших „Червених пупчох”, а по спознаню з наших дружтвох, буду виведзени и прейґ 11 танци.

На основи контактох орґанизатора „Ружи” Дому култури Руски Керестур з КУД-ами по наших местох, на Програмним одборе винєшене же шицки дружтва приявели точки за манифестацию „Одгуки ровнїни”, алє найвецей шпивацки, односно шпивацких ґрупох, и даскельо танци. „Одгуки ровнїни” буду тиж на пияток, 30. юния, на отвореней сцени у Школи „Петро Кузмяк”, як и „Пупче”.

Шветочни концерт у рамикох Фестивалу уна отвореней сцени будзе на соботу, 1. юлия, а на вчерайшей схадзки порадзене же би попри домашнього Мишаного хору, шпивачох и фолклорного ансамблу керестурского Дому култури, на Концерту наступели и Хор „Гармония” з Нового Саду, як и танєчни ансамбл КУД „Сербия” з Кули. Окремни блок на Шветочним концерту будзе мац Поддуклянски уметнїцки народни ансамбл (ПУНА) з Прешова, зоз Словацкей.

Попри тим же за тераз нє до конца познате з кельо и якима точками на манифестацийох „Ружи” будзе участвовац КУД „Тарас Шевченко” з Дюрдьова, понеже би у тот час мал госцовац у Польскей, нє познате анї кельо будзе младих шпивачох, змагательох за найкрасши дзивоцки и леґиньски глас.

По схадзку Орґанизацийного одбору „Ружи”  би и тота дилема мала буц розришена, односно будзе познате дзе и кеди будзе отримане змаганє за найкрасши глас – чи як окремна манифестация внєдзелю, 2. юлия (у сали Дому култури), чи у рамикох пиятковей програми „Одгуки ровнїни”. Пре барз мале число хтори сцигли на конкурс, и на тей схадзки поведзене же змаганє нових забавних композицийох нє будзе отримане анї того року.

На Програмним одборе вчера потвердзене же и того року под час „Ружи”, на соботу, у Майсторским доме и коло нього будзе орґанизовани Керестурски саям, а исти дзень Медзинародни турнир у одбойки у рамикох СБ „Яша Баков” у Спортскей гали.

3-Ruza-02

ПОВЯЗАНИ ТЕКСТИ