Ище раз о руским єдинствe

автор михайло катона
987 Опатрене

З часу на час у рускей явносци зявюю ше поєдинци застарани пре нєєдинство у рускей заєднїци, лєбо у єй орґанох и целох. Тоти амбицийни борци за руске єдинство найчастейше застарани прето же рижни припаднїки рускей заєднїци о даєдних конкретних питаньох нє думаю так як вони, лєбо як дума векшина. При тим вони, по правилу, забуваю голєм даскельо ствари.

Перше, же природни стан стварох же кажде од нас о каждей ствари ма свойо думанє, и же нє кажде порихтани свойо думанє пременїц лєм прето же дахто други, лєбо даяка векшина, дума иншак.

Друге, же, по правилу, думанє векшини само по себе нє квалитетнєйше од думаня меншини, окреме кед є збудоване на демаґоґиї, популизму, полтронстве и подобним.

Треце, же цо основа на хторей ше жада посцигнуц єдинство. Чи то думанє даяких лидерох общей компетенциї, чи то думанє аґресивней векшини препарираного розума лєбо думанє даяких намесцених ношительох демократиї, чи то даяка, на демократски способ скорей утвердзена национална политика хтора ше тераз операционализує.

Штварте, же єдинство до хторого ше дойдзе през прицисок векшини, а нє през арґументоване прешвечованє меншини, заправо преглашене, односно октроисане єдинство, док велї и далєй маю свойо иншаке думанє и нє порихтани су участвовац же би ше таке надрилєне єдинство витворйовало у пракси.

Пияте, же нєприлапйованє опредзелєньох векшини, їх знєважованє, иґнорованє и обструкция у политичней борби леґитимне средство.

Дисквалификованє тих цо иншак думаю и цо нє приставаю на диктат векшини, та ше процив нього боря на шицки способи, нє ма нїякей вязи зоз демократию. У декларованих демократох котри би виганяли, елиминовали и примушовали тих цо иншак думаю, кучи голи тоталитаризам. Посцигованє єдинства на таки способ нїґда нє було анї нє будзе циль хтори руска заєднїца треба же би жадала витвориц.

Зоз иґнорованьом и фактичним одруцованьом Националней стратеґиї Руснацох, Национални совит рускей националней меншини страцел демократски утвердзену платформу за вибудов єдинства заєднїци и єй орґанох у култури, образованю, информованю и хаснованю мацеринского язика и писма. Попри того, зоз иґнорованьом Стратеґиї иґнорує ше и у нєй утвердзене положенє Грекокатолїцкей церкви у явним живоце рускей заєднїци, одношенє заєднїци спрам резултатох єй  националного препороду у чаше социялистичней Югославиї, одношенє спрам вредносцох хтори допомогню моцнєню националней свидомосци и самодовирия младих ґенерацийох и дзепоєдни други, тиж сущни опредзелєня.

Без Националней стратеґиї Национални совит, Завод за културу, „Руске слово” и його виданя, уключуюци його видавательство, редакциї радия и телевизиї, нашо школи, дзецински заградки и други нашо субєкти културного живота, осудзени на роботу од случая до случая, спрам волї тих цо водза орґанизациї и институциї, а нє по критериюмох демократски утвердзеней националней политики.

Национална стратеґия єдина и нєзаобиходна платформа за националне єдинство рускей заєднїци у Сербиї. Кед же є даґдзе нєподполна, нєдоповедзена, превозидзена лєбо просто, нєодвитуюца, треба же би ше у демократским процесу дополнєла и пременєла же би вец така дополнєна и пременєна була основа рускей националней политики и платформа за виградзованє єдинства Руснацох и руских орґанох и институцийох. Без того, ми нє маме принципиєлну основу за будованє єдинства, та нам мира стварох постава добра лєбо зла воля менєй, лєбо вецей компетентних лидерох  нєпрешвечлївого интелектуалного и моралного капацитета, лєбо документи и пракса Руснацох и їх орґанизацийох од пред сто роками. Нароком ше при тим забува же руска заєднїца теди мала до 20 священїкох и можебуц ище тельо других универзитетски образованих людзох, а нєшка ма исто коло 20 священїкох, алє  и вецей як тисяч високообразованих людзох найрижнороднєйших фахох.

Правенє привиду же ми исти як зме були пред сто роками, и ґлорификованє давней прешлосци, уж приводзи до иґнорованя руских орґанох и институцийох и скоро шицкого цо роби такволана руска културна елита. Треба буц шлєпи та нє видзиц скоро подполну изолованосц постояцих руских орґанох и институцийох од векшини младих руских школованих людзох. Ми шведкове велького нєпорозуменя з нашу младу ґенерацию. Пред нїх можу висц лєм таки як вони и лєпши од нїх, а ту нє спадаю тоти цо „муца” зоз виберанковима лїстинами, тоти цо без огляду на квалитет, дриляю свойо потомство до руских институцийох, лєбо гевти цо би зачувац свою демократску леґитимацию и вируцовац зоз демократского процесу тих цо иншак думаю.

Руснаци образована, национално узрета и цивилизована заєднїца. Таки народ можу водзиц лєм найлєпши, найодвичательнєйши и найчеснєйши медзи нами котри почитую тот народ. За тото ше нам треба бориц, бо шицко друге то политиканство хторе ту нїґда нє преходзело.

ПОВЯЗАНИ ТЕКСТИ