Иґор Мирович вчера у Коцуре нащивел фамелиї вибеженцох

автор злк
932 Опатрене

КОЦУР – З нагоди Шветового дня вибеженцох вчера, 20. юния, Коцур нащивел предсидатель Покраїнскей влади Иґор Мирович, котри штиром фамилийом уручел помоц хтору достали на конкурсу Фонду за даванє помоци вибеженцом, вигнатим и розселєним особом за економске змоцньованє вибеженскей популациї.

Помоц од Фонду Мирович фамилийом уручел у обисцу Снежани Зрнич, у котрим орґанизоване стретнуце з вибеженскима фамелиями и з тей нагоди гварел же Покраїнска влада у будучносци будзе видзельовац вецей средства за помоц сцекнутим, розселєним и вигнатим особом за ришованє їх квартельних проблемох и за змоцньованє їх економского положеня..

Предсидатель Покраїнскей влади визначел же конєчни циль то подполна интеґрация вибеженских фамелийох до нашого дружтва, понеже векшина зоз 27 000 особох котри у Сербиї реґистровани як вибеженци, жиє у Войводини.

Вредносц помоци хтору достали штири коцурски фамелиї вибеженцох коло 1 500 еври два фамелиї достали систему за залїванє и мотокултиватор, єдна пластенїк, а єдна опрему за пчоларство.

З Иґором Мировичом у Коцуре вчера бул и директор Фонду за даванє помоци вибеженцом, вигнатим и розселєним особом Душко Чутило, а домашнї им були заменїца предсидателя Општини Вербас Миляна Штулич, член Општинскей ради Вербас Даниєла Илич и секратарка Месней заєднїци Коцур Єлена Бесерминї.

ПОВЯЗАНИ ТЕКСТИ