ШИД – Предсидатель Покраїнскей влади Иґор Мирович вчера, 11. септембра, нащивел роботи на ушореню будуцей Индустрийней зони при Адашевцох нєдалєко од Шиду, дзе тирва вибудов приступней драги длужини коло 800 метери, цо перша фаза вибудови Зони. З покраїнским премиєром у нащиви бул и подпредсидатель Покраїнскей влади Дьордє Миличевич, а домашнї им бул заменїк предсидателя Општини Шид Зоран Семенович.
Мирович з тей нагоди констатовал же роботи добре напредую и же АП Войводина финансийно помага вибудов капиталних проєктох, понеже тота у шидскей општини тераз єденаста индустрийна зона у Войводини хтору финансує Покраїнска влада.
Мирович додал же Покраїна обезпечи средства и за предлуженє роботох у тей зони, як цо то за єй електрификованє, як и же добре положенє при авто-драги Беоґрад-Заґреб и блїзкосц гранїци з Републику Горватску, до Адашевцох и шидскей општини прицагню инвеститорох, цо значи и нови роботни места. Визначене же цалосна вредносц того проєкту коло 33 милиони динари и же го заєднїцки финансую АП Войводина и Општина Шид.
Дзекуюци на помоци АП Войводини, Зоран Семенович здогаднул же Покраїна уж опредзлеєла 16 милиони динари як софинансиєр за приступну драгу, а од Покраїнского секретарияту за польопривреду, водопривреду и лєсарство ище шейсц милиони динари за одводни ярки, цо будзе поробене у другей фази.