ҐОСПОДЇНЦИ – Основну школу „Жарко Зренянин” у Ґосподїнцох вчера, 24. фебруара, нащивели предсидатель Покраїнскей влади Иґор Мирович и директор Управи за капитални укладаня АП Войводини Неделько Ковачевич, у хторей починаю роботи на законченю вибудови физкултурней сали и отворених спортских теренох, за цо средства обезпечела АП Войводина.
Домашнї госцом з Покраїни були предсидатель Општини Жабель Чедомир Божич и директор ґосподїнскей ОШ Дарко Вранешевич.
Будованє физкултурней сали започате пред седем роки и нєдокончене є, а за закончуюци роботи на сали и спомнутих теренох, ОШ од Покраїни достала 10 милиони 720 256 динари. Закончене вибудови плановане до початку шлїдуюцого школского рока, у септембру.
После обиходзеня Школи и нєдоконченей сали, шицким школяром котри участвовали у кратшей програми пририхтаней з нагоди тей нащиви, директор Управи за капитални укладаня Неделько Ковачевич подаровал школярски ташки, а на пондзелок ташки достаню и други школяре.
Предсидатель Покраїнскей влади вчера нащивел и Жабель, дзе з предсидательом општини Чедомиром Божичом бешедовал о утвердзеним планє инвестицийох у тей општини у тим року, а за дзепоєдни дзень пред тим подписани контракти з Управу за капитални укладаня Войводини.