РУСКИ КЕРЕСТУР – И далєй ше збера пенєжна помоц осемдзешатрочней Ксениї Шимко за векшу оправку на хижи понеже дакус вецей як пред мешацом єй у преднєй часци обисца спадла цала повала.
Як зме теди писали, по першим преценьованю чкоди за оправку закрица и повали за материял и роботу було потребне коло 2 000 еври, алє после подробнєйшей анализи майстрох, за саниранє тей нє малей чкоди, коло 50 квадрати закрица и 30 повали, будзе требац коло 90 000 динари.
Гоч сума вельо менша, за скромну пензию Шимковей то барз вельки видаток хтори вона нє ма, та ше у валалє орґанизовало добродзечне зберанє помоци, рахуюци же лєпше дац як примац. Хто жада и може помогнуц може свой прилог дац до окремней шкатули у Месней заєднїци, або уплациц на жиро-рахунок Шимковей. 200-65255030-41 отворени у банки Поштанскей шпоровнї.
До акциї ше придружел и парохийни Каритас, та добродзечни прилог вирни можу дац и до шкатули у штред церкви, або на парохиї, а дознаваме же пенєжна помоц Шимковей прейґ нашей, сцигла и з єдней парохиї у Суботици.