БЕОҐРАД – Шицки єдинки локалней самоуправи у своїх буджетох убудуце буду мушиц плановац средства и за защиту животного штредку, сообщене з Министерства за защиту животного штредку после схадзки министра Ґорана Тривана зоз шефом Делеґациї Европскей униї у Сербиї Семом Фабрициом, на хторей бешедоване о пририхтованю за Поглавє 27 у прегваркох Сербиї о приступаню ґу ЕУ.
Як гварел министер защити животного штредку Ґоран Триван, будзе виробена подробна анализа стану у тей обласци, а як приоритетни проєкти визначел пречисцованє одрутних водох, управянє з комуналним одпадом, ремедияцию жеми и борбу процив климатских пременкох, за цо, як найтуньши и найефикаснєйши способ, наглашел полєшованє.
Як сообщене, Сем Фабрици визначел же Сербия, як партнер ЕУ, може раховац на шицку можлїву помоц и потримовку у злєпшованю актуалней ситуациї у тей обласци, як и же Делеґация ЕУ у Сербиї да потримовку ресорному министерству у промовованю цильох за защиту животного штредку.
Собешеднїки ше зложели же у наступним периодзе треба змоцньовац капацитети локалних самоуправох у шицких поглядох, а окреме у сфери вирабяня и финансованя проєктох з обласци защити животного штредку, у чим локални самоуправи буду мац потребну помоц.