Йоґа – драга ґу миру

автор фес
2.4k Опатрене

Нєт особи хтора би нє знала повесц слово два о йоґи, и мала о нєй якуш представу. О нєй мож слухац у медийох, а и кнїжки на тоту тему мож виберац. Нє нєпознате же з вежбаньом йоґи особи змиренши, опущенши и маю якишик нукашнї мир, а причини же би ше дахто одлучел вежбац, розлични. Єдни вежбаю бо им стануло до крижох, або пре болї у плєцу, други же би ше научели концентровац, даєдни пре свойо филозофски прешвеченя, або чули, пречитали же мож досцигнуц цошка  цо ше им на перши попатрунок видзи же то тото  цо сцели цалого живота спознац.

Та, заш лєм, велї о нєй знаю барз мало.

Йоґа, сиґурне, вельо вецей од здуманей методи за цо красши випатрунок цела… А цо вона у сущносци?

Єст вельо дефинициї йоґи, вокраци – то духовна дисциплина хтора зоз запровадзовањом физичних вежбох, технїкох диханя и медитацию, водзи ґу єдноти и самореализованю.

Оля Хома

Физични вежби, асани (санскрит) положеня хтори змоцнюю цело, виправяю хиби, або помагаю при почежкосцох. Зоз технїками диханя, хтори провадза вежбанє, повязуєме ше зоз собу и на физичним и на менталним уровню, бо кед свидомо и глїбоко дихаме, змирюєме и „сцихшуєме” роздумованє, рой думкох… Сучасни способ живота нас одцагнул од такого приступу ґу животу и и нє чудне же вше векша заинтересованосц за тоти прастари технїки.

Правда, перше кажде при нєй обачи лєпши випатрунок, злєпшане здравє,  просте триманє, а и же  болї попущели… Но, момент кед процес пременкох почнє при особи и зоднука, кед пременї дзепоєдни становиска, роздумованя и попатрунки на швет, кед особа напредує и будує мирнєйши живот, мож повесц же аж теди у йоґи почина видзиц плоди своєй роботи.

ПОБИДА НАД САМИМ СОБУ

Йоґа практикант нє находзи подпору за витворйованє  резултатох  у змаганю з другима, алє у превозиходзеню власних огранїченьох, зочованю зоз страхами, повязованю физичних, емотивних и менталних часцох живота, а вец у їх виглєдованю и балансованю.  Так почина бешеду о йоґи Оля Хома, наша позната новинарка у Рускей редакциї на Радию и инструкторка йоґи хтора ше першираз з йоґу стретла пред седем роками. Пред трома роками закончела курс за инструктора хата йоґи,  а нєдавно и курс за инструктора терапеутскей йоґи и аюрведи – медицина йоґи. Уж даскельо роки роби як инструкторка у Новим Садзе.  

 – Почала сом з вежбами 2011. року и такой сом ше заинтересовала. После даскелїх рокох сом ше уписала на курс за инструктора з намиру учиц и виглєдовац вецей о шицким. У тим ме потримала моя инструкторка зоз хтору вежбам одпочатку. Тераз вецей помагам другим, а остатнї роки и вельо виглєдуєм. Ходзим ґу рижним инструктором пробовац иншаки файти, стили йоґи, информуєм ше и образуєм у тей обласци хтора вєдно зоз аюрведу безконєчно обсяжна. Прицагує ме тото же яка є стара и у основи, хата йоґа зачувала традицию уж вецей тисячи роки. Йоґа нас учи реаґовац на пременки и прилапиц их, а живот то нєпреривна пременка, то закон. Так як цо ше и ми кажде рано зобудзиме иншаки, так на нас уплївую ситуациї и людзе у каждодньовим контакту. Треба же бизме освидомели тоти уплїви, а тиж и же бизме мали контролу над собу, над своїма чувствами и реакциями,  з єдним словом – же бизме запановали над своїма думками. Тиж так, йоґа нас учи дисциплиновац ше, а кед сцеме резултати, мушиме буц пошвецени и провадзиц систему, програму яку зме себе задали и нє глєдац вигварки у єй запровадзованю – гвари Оля и предлужує же при йоґи мож швидко почувствовац резултати, та тот хто вежба ма вше векшу дзеку предлужиц зоз тренинґом.

– Нїч нагло, зоз трапеньом и церпеньом, а зоз другого боку сами од себе починаме вимагац вецей так же ше тоти гранїци починаю преширйовац.

И САМА СПОЧАТКУ ДО НЄЙ НЄ ВЕРЕЛА

Спочатку була скептик, думала же йоґа нє за єй темперамент и становиска, алє була любопитлїва, а пошвидко и заинетересована за йоґу и предлужела вежбац. О даскельо мешаци настали суптилни процеси пременкох, випросцена похребцина, триманє, блїщацша скора, красши попатрунок… Пачело ше єй, нє одуставала…

 – Була сом скептик, а постала сом пошвецени практикант. Напевно же нє мож контроловац шицко у живоце, алє мож примерковац на свойо реакциї на вше вецей импресиї звонка, вше вецей информациї, напади на чула… Ми нє знаме буц цихо, нєприємно нам кед нє робя електрични апарати, шицки зогнути над телефонами… Добре чувство кед видзице же можеце препознац власни потреби и импулси, кед  маце векшу толеранцию на фрустрациї. И вец кед ше лєм дакус сцихшаю думки и уплїви звонка, ви маце векшу дзеку, идеї, нови ришеня за стари бриґи, преставаце ше хмуриц, плїтко дихац и бац ше од швета и хоротох и хто зна чого шицко нє. Поставаце свидоми же шицко повязане, и людзе и природа, микро и макро космос и же ше мушиме одвичательно справовац, на першим месце ґу себе, а вец и ґу шицкому другому.  Видзиме же мушиме  мац вецей порозуменя, а вец и лєпше розумиц зявеня и упечатки – гвари Хомова.

ЙОҐА И ПСИХОТЕРАПИЯ

Оливера Стойшич

 – З вежбаньом йоґи за остатнї дзешец роки прешвечела сом  ше же векшина наших сущних становискох ґу животу и самому себе, ма физичне упорище у нашим целу. То драга на хторей можеме вельо научиц о себе и нашому одношеню ґу животу – гвари психолоґиня Оливера Стойшич, РЕБТ психотерапеуткиня.

–  Док ше нацагуєме у розличних положеньох хторе тирва даскельо минути, розвиваме одлучносц, бо зоз змиреним, виєдначеним диханьом и ширеньом плюцох посцигуєме мир. Витримовносц и чувство универзалного настава зоз спознаньом нєпреривного зменьованя напартосци и опущованя у ритме у хторим кажди удих и видих єден циклус, або вибрация у универзуму – гвари вона наглашуюци же  йоґа процес зочованя и превозиходзеня власних огранїченьох, а чи тото шицко нє мож посцигнуц зоз психотерапию?

Стойшичова трима же нас йоґа учи як ше стваря енерґию и як ше ю унапрямує до розличних часцох цела. З тим ше  оможлївює розбиванє психичних блокадох, а звекшує енерґию хтора, заш, отвера простор же би до живота вошли нови интересованя.

– Положенє – алат за випитованє и „отверанє” цела. Нєпреривно ше одвива бависко медзи трансформацию и отпором ґу пременки, и тримам, сиґурно нє останєце таки яки сце були по тераз. Постанєце твардейши („пребиєце” уколяєни шаблони роздумованя, справованя, звикнуца…) и пременїце ше. На лєпше – гвари Оливера Стойшич.

З шицкого виходзи же  индийски мудри людзе и учителє хтори йоґу   одкрили пред даскельо тисячи роками и розвили же би помогли людскому роду, нє могли лєпше зробиц. Сцели мац методу хтора би завишела лєм од того цо уж кажди чловек ма: од цела, духа и розума (ума), же би була єдна цалосц – єдинство.

Людзе сцу досцигнуц шицко тото за цо чули, або пречитали же мож посцигнуц з йоґу. Цо скорей. Так як и кед су хори, попию лїк хтори их такой вилїчи.

Йоґа инструкторе и учителє гваря: У йоґи – помали и сцерпено, бо иншак нє мож. Йоґа нє ма одвит такой, нє ма анї ришеня. Єй драга природна,  а до резултатох ше доходзи поступнє у вежбох и з тварду дзеку.

ПОВЯЗАНИ ТЕКСТИ