КОЦУР – Стреду, 10. октобра, у Месней канцелариї инвалидних и других пензионерох, а у рамикох проєкту Европскей униї „Пионире у пракси” подписани протокол о сотруднїцтве медзи Коцурским здруженьом младих КУМ и Националним парком „Їу Вали” зоз Румуниї, алє и медзи Сербию и Румунию.
Циль протоколу, котри спред КУМ-а и Националного парку „Їу Вали” подписали Стеван Самочета и Ионел Циока, же би помогнул у активносцох и нових проєктох котри буду реализовац на тему очуваня животного стредку.
Подписованє протоколу потримал и предсидатель Општини Вербас Милан Ґлушац котри визначел же свидомосц жительох општини Вербас о очуваню животного стредку на високим уровню и же Општина потрима реализацию того протоколу на кажди можлїви способ.
До прейгранїчних проєктох би требала буц уключена и наша руска заєднїца, та у плану обисц нашо руски места и фаховцови зоз Румуниї презентовац нашо обичаї и културу.
Ионел Циока би концом октобра знова требал присц до Коцура же би ше розпатрело можлївосци конкурованя ище на даєдни проєкти, а члени КУМ-а тиж поволани же би на яр пошли до Румуниї и обишли Национални парк у Румуниї, алє и подписали протокол о предлуженю сотруднїцтва.