Шатва пресади паприґи до пластенїкох пожнєла, пре шнїг и жимни период концом фебруара и початком марца, алє заш лєм векша часц пошате у оптималним термину. После добрей сезони як цо то була прешлорочна, у керестурским хотаре мож обчековац векши поверхносци засадзени з паприґу, алє и нових младих паприґарох.
Як поведзене на єдним з викладаньох котре орґанизовало Здруженє паприґарох „Капсикум анум” − хто нє кадри випродуковац два ваґони другей класи паприґи котрей просекова цена 30 динари, тот би нє требал анї садзиц паприґу.
У добрим року паприґаре зазначую урожай по гольту котри и вецей як два раз векши, таки бул прешли. Паприґу ше почало оберац ище у авґусту, кед була цалком желєна, а за цо була налога и интересованє паприґарох, так уж тераз ше велї розпитую же чи будзе ознова орґанизовани таки одкуп.
Заш лєм, нє вше шицко завиши од продукователя, вельо койчого завиши од природних обставинох котри иншаки з рока на рок. Так остатнї даскельо роки, були и сушни и диждовни сезони, бактерийске дзешаткованє, налоги инсектох − вчас цвикловей пипи, трипсу и кукурицового мотилька, шнїг у априлу прешлого року таки час, та и прешеванє вчас пошатей пресади того року.
ЗАГРАДИ ШЕ ЗАБИЛЄЛИ ОД ПЛАСТЕНЇКОХ
Керестурски загради ше забилєли од пластенїкох у котрих пошата пресада. Нєт обисца котре, кед нє у своєй, вец у сушедовей загради нє ма пластенїки. Пошате вецей пресади як прешлого року – лєпше предац, як куповац, а знаме же за керестурску паприґу интересованє вельке. Уж тераз єст догварена продукция и за заградкарох з других местох.
Паприґар, иноватор механїзациї за олєгчане оберанє паприґи котру представял на прешлорочней паприґарскей манифестациї, Мирослав Ковач, того року продукує пресаду лєм за предай, а од продукциї паприґи одступел праве прето же би ше му удало докончиц и усовершиц траку за оберанє паприґи, и наздава ше же будзе по наиходзацу паприґарску манифестацию.
– Єдну часц пресади сом уж предал, продукуєм ю по догварки. Так сом пошал до пластенїкох „слоново ухо”, „червене злато” и „мишину”, зоз шицких трох понукам пресаду у ткв. контейнерох и таргану пресаду котру ше предава на квадратни метер – гварел нам Ковач.
ДОГВАРКИ КОЛО ОДКУПУ
У керестурским Здруженю того року єст аж 145 членох, число котре нїґда нє було векше – гварела предсидателька Здруженя и директорка Задруґи Душица Орос. – Озда и обчекованя од керестурского тарґовища векши. Здруженє нє могло одкупйовац паприґу, алє поштредовало у сезони 2016. року, а прешлого року пецеро члени Здруженя реґистровали Землєдїлску задруґу „Керестурска паприґа” котра, медзи иншим, и одкупює паприґу.
Правиме список же бизме мали податки о точних поверхносцох, и сиґурно же того року будзе вецей паприґи. Як чуєм и як видзиме по списку, скоро кажде звекшує поверхносц. Думам же ше поверхносци звекшує прето же за нами добра сезона, а цо можеме обчековац од наступней, то ище вше нє мож знац.
Идуцого тижня ше будземе стретац зоз одкуйовачами, так же будземе знац яке количество им будзе потребне, а за цену ище нє знаме нїч и верим же нє будзе конкретизована так вчас – гварела Душица Орос.
УКЛАДАНЯ ВШЕ ВЕКШИ
Укладаня вше векши, а репроматериял котри ше хаснує у продукциї драгши. Мож го куповац и за готови пенєж, и на одложене плаценє на вецей местох у валалє, а як дознаваме, менєй ше купує на одложене плаценє.
Зоз вецейрочним искуством у паприґарстве, котре почали ище дїдове и прадїдове нєшкайшей паприґарскей ґенерациї, кед ше садзело лєм билу паприґу, а на пияц ше ю одношело аж и до Горватскей, Керестурци прешли на червену рогову паприґу. Мали процент тих котри продукую други сорти.
Нашенє ридко хто купує, кажде найволї пошац свойо, котре преверене и од котрого ше зна цо мож обчековац. Попри тим, и того року Здруженє поштредовало у купованю „Супериорового” нашеня „слоново ухо” по вигоднєйшей цени, а як дознаваме, предате приблїжне количество як и прешлого року.
Єст паприґарох котри до свойого нашеня умишаю сушедово, або даґдзе купя красну сорту, котру потим крижаю зоз свою. Зоз успихом ше можу похвалїц велї, алє найлєгчейше ше хвалїц после добрей сезони, кед ше попреда шицку паприґу, по релативно задоволююцей цени, як цо то було прешлого року.
ДВА ТЕРМИНИ ЗА ВРАЦАНЄ СРЕДСТВОХ
Ресорни покраїнски секретарият розписал конкурс на котри конкурую керестурски паприґаре зоз инвестициями котри витворели на початку сезони, як цо то у першим шоре залївни системи, а отворени є по 15. май, односно покля єст средства.
Нови правилнїк пооштрени, а паприґаре ше знаходза на рижни способи же би сполнєли минималне число бодох.
Друга можлївосц дзе нє таки строги правилнїк, то подношенє вимоги за врацанє средствох при Управи за аґрарни плаценя, дзе мож придац предрахунки за чечуци рок од 1. юлия по 30. септембер, а по позитивним одвиту вимогу за виплацованє од 15. априла по 15. октобер. То значи же то шицко инвестициї аж за идуци рок.
