З нагоди Святого Трифуна, защитнїка винїциох и винїцарох, прешлого тижня у Беркасове отримана традицийна двацец друга по шоре манифестация пошвецена вину „Сримска винияда”. На дзень швета 14. фебруара по традициї пошвецена винїца у кума тогорочней манифестациї, Джона Файфрича, предсидатель Совиту Месней заєднїци Беркасово, хтора и орґанизатор винияди з помоцу општини Шид и Туристичней орґанизациї.
Прикладнїки вина од винарох два днї примала окремна комисия, а после того фахова комисия у хторей професор доктор Слободан Йович, дипломовани инженєр Слободан Шапоня и доктор Александар Петрович, оценьовали вино.
Преглашованє побиднїкох отримане на шветочней вечери у ресторану „Далас” у Беркасове, а з тей нагоди шицких винарох и госцох привитал Велимир Ранисавлєвич, предсидатель СО Шид. З тей нагоди богати етно-стол порихтали жени зоз Здруженя женох „Жридло” з Беркасова, хтори по традициї на уходзе до сали госцох дочековали з поґачом, солю и палєнку. Єден куцик сали бул прикрашени з малюнками хтори виложели маляре зоз Шиду.
Окрем смачней вечери и вина, доброму розположеню допринєсли и тамбураше „Тайна” зоз Руми, а орґанизаторе ше остарали и за томболу. „Сримска винияда” трима уровень, бо ма медзинародни характер з понеже вина викладаю винаре и зоз Горватскей, и з Босни и Герцеґовини.
– Ми барз задовони же Винияда преросла до манифестациї за хтору ше зна и у реґионє, и же маме викладачох зоз сушедних державох. То лєм доприноши подзвигованю квалитета, а источаснє и повязованє нашого штредку зоз реґионом, насампредз зоз Републику Горватску хтора членїца Европскей униї – гварела Кристина Радосавлєвич, директорка Туристичней орґанизациї Шиду.
Єден зоз винарох хтори роками приходзи и виклада на винияди и Андєлко Прокопец зоз валалу Бапска зоз Републики Горватскей хтори гвари же го анї нєпорозуменя медзи двома державами нє зопарло, и же би ознова пришол.
– На Винияду приходзим дзешец роки, а того сом, на оценьованє, принєсол штири вина. Прешлого року бул одлични урожай грозна та и вино було одличного квалитету. Я патрим на тото цо нас злучує, а то вино, бо ми нє политичаре, алє винїцаре и продукователє вина – кратко виявел Прокопец.
Иншак, перше место у катеґориї билих винох освоєл Раде Комазец зоз Индїї, друге Пиньвица „Косанович” зоз Старей Пазови, а треце Винариї „Паїч” зоз Берчкей, зоз Босней и Герцеґовини. У катеґориї билих винох було 34 приявени вина за оценьованє.
У катеґориї червених винох за оценьованє було 29 вина. Перше место освоєл Влада Панайотович зоз Беоґраду, друге Славица Чолич зоз Товарнїку, Република Горватска, а треце продукователь котри ше нє зявел.
Орґанизаторе оценєли и пейц прикладнїки розе вина, а Драґомир Стаменкович зоз Печинцох освоєл перше место.
Орґанизаторе преглашую побиднїкох и у катеґориї домашнїх продуковательох вина зоз Беркасова, та, того року Никола Савич мал найлєпше било вино, а Предраґ Митрович червене вино.
ШВЕТОЧНО У СОКОЛОВЕЙ ВИНЇЦИ
На швето Святого Трифуна до винїци пошол и познати продукователь грозна и вина Мирослав Сокол зоз Бикичу. Винїцу з тей нагоди благословели нашо паноцове о. Михайло Режак зоз Шиду и о. Владимир Еделински Миколка зоз Беркасова. После обряду пошвецаня винїци за добри урожай, присутни ше почасцели з добрим єдлом и вином.