За найуспишнєйшу каратистку Карате клуба „Русин” за 2017. рок преглашена Анамария Няради з Руского Керестура, хтора у маю прешлого року освоєла перше место у борбох у поєдинєчней конкуренциї у катеґориї кадеткиньох на Европским першенстве Шотокан Карате союзу. О тим прецо вибрала праве карате, чом люби тот спорт, дзе го тераз тренира и друге, виприповедала нам за МАК.
На кельо роки ши почала тренирац карате и прецо праве тот борительни спорт?
Анамария Няради: Почала сом тренирац кед сом мала седем роки. Нє вибрала го я, алє мойо родичи, насампредз же бим була активна у даяким спорту. Тиж так, и прето же бим ше знала одбранїц од, наприклад, даякей опасносци на улїци.
Хтори тераз маш пас и чи знаш кельо ши потераз освоєла медалї?
АН: Мам кафови пас, нарок вироятнє будзем покладац за чарни, а медалї мам коло 45.
Хторе змаганє ци наймилше на хторим ши була?
АН: Найбаржей будзем паметац Европске першенство тото цо було у маю, як и Державне и Войводянске першенство.
У хторей дисциплини ше найчастейше змагаш?
АН: Остатнї роки ше баржей змагам у борбох, як у катох.
А цо волїш, борби, чи кати?
АН: Борби, дефинитивно. Барз сом их полюбела, динамични су и виволую ми адреналин.
Було змаганя зоз хторих ши ше врацала покалїчена?
АН: Було таки хвильки кед сом ше покалїчела на змаганю, алє то, єдноставно, часц того спорту.
До хторих сце местох путовали на змаганя?
АН: Завиши од турнирох, єст мали и вельки турнири. Кед даяки векши змаганя, як цо то Державне першенство, то були места як цо то Пожаревац, Лазаревац, Шабац, Яґодина…
Активна ши и у даяких других спортох? Чули зме же окрем у „Русину”, тренираш и у єдним суботицким клубу. Так?
АН: Нє, активна сом лєм у каратеу. Тераз сом перша штредня у Медицинскей школи у Суботици, напрям физиотерапеут. Понеже сом там у штредньошколским доме, одвитує ми и там тренирац у Клубу „ЕНПИ”, єдним од наймоцнєйших клубох у Суботици, так же тераз тренирам и за „Русин” и за спомнути Клуб.
Хтори клуб моцнєйши, „Русин”, чи „ЕНПИ”?
АН: Завиши од порихтаносци и змаганьох, алє су, у сущносци, подобни клуби по моцносци.
Яки реакциї кед твойо парняки чую же тренираш карате?
АН: Хлапци углавним подценюю каратистки, бо думаю же то баржей хлопски спорт, и же вони моцнєйши од нас, дзивчатох.
Тренираш уж вельо роки и треба буц витримовни и упарти. Хто ци дава найвекшу потримовку?
АН: На першим месце родичи, хтори ме вше гнали тренирац, гоч ше ми и нє сцело. Тераз сом им барз на тим подзековна. Дакеди ми ше наисце нє тренирало, алє сом пошла и после сом ше супер чувствовала. Треба буц упарти, бо нє вше маме шлєбодного часу попри школи и других обовязкох.
И тренер ци велька потримовка?
АН: Так. Тренер Михал Орос нам барз шицким помага и вельо нас научел.
Кельо раз до тижня маце тренинґи?
АН: Углавним три раз до тижня. Кед ше пририхтуєме за даяке векше змаганє, як цо то було Европске першенство, вец тренинґи знаю буц и кажди дзень.
Як випатра єден ваш тренинґ?
АН: Завиши од файти тренинґу, алє ше вше на початку зогриваме. Кед робиме кати, вец робиме лєм их до конца тренинґу. Кед слово о борбох, вец робиме даяки технїки, шлєбодни спаринґи…
Хто ци облюбени партнер у спаринґу?
АН: Найволїм робиц зоз Мартину Рац.
Любела биш дакеди буц и тренер?
АН: Любела бим тренирац других и научиц их тото цо я научела.
Єст даяки правила у каратеу хтори биш визначела?
АН: У початку нам тренер толковал же цо то карате, даяки правила и подобне. Гей же карате служи як самоодбрана, алє ше го нє шме применьовац у даяким спричканю и без даякей причини, лєм кед то наисце нужно.
Находзиш даяки совити коло каратеа и на интернету?
АН: Кед мам шлєбодного часу, любим поопатрац и даяки приклади кондицийних тренинґох. Углавним поопатрам же як други робя кати и борби.
Маш ище даяки гобиї?
АН: Любим патриц филми.
Мушела ши ше од дачого и одрекнуц пре карате?
АН: Углавним то були пиятково друженя и виходи, а дружтво нє вше розумело же мнє длуго тирва тренинґ, та сом после вистата и нє сце ше ми виходзиц.
Цо биш поведла младим, прецо карате добри спорт?
АН: Карате ми помага при ученю, лєгчейше ше сконцентруєм. Помага барз при здравю и полєпшує ровновагу и кондицию. Велї дзивчата ше нє знаю одбранїц, а праве карате служи и за самоодбрану. Тиж так, добри є пре дружтво. Ми у Клубу єдна заєднїца и потримуєме єдни других.